بسم الله الرحمن الرحيم
بدون مقدمات
الحمران اسم اشتهر وحفظ لهم التاريخ حقهم
وشفت نقاشاتكم بالموضوع .
والحين انا اكتب الموضوع وسالفة الحمران
الاخوان الثلاثه هــم ..
حمد ( بسكون حرف الميم ) , وحامد , وحميد , وهم عيال
محمد بن فهيد ملفي ابن مسلم ابن ميزان
وهو دليقاني
إما كليب ابن عمهم فهو كليب ابن عويض بن فهيد ملفي ابن مسلم ابن ميزان .
الأخوان الثلاثه ( حامد , حمد , حمد )
كان لهم سابقاً شداد وبارق .
الحمران الثلاثه صارت عليهم حادثه والكل يسمع فيها انهم حلفو كذب
وهذا صحيح لانهم أخذوا أبل الهمرق العتيبي ولا اعرف اسمه بالضبط
وجاهم العتيبي وقالهم هاذي ابلي وأنكروا الحمران انها أبله .. وقال العتيبي
تحلفون يالحمران انها أبلكم .. وحلفوا الحمران كذب .. و دعا عليهم
العتيبي .. ومن بعدها بدو الحمران يموتون واحد ورى الثاني وكله بمرض
الجدري ..
إما ماذكره الرويس بأن الحمران حالياً غوامد أوحروب
كل هذا طلعوا مسمى عوائل فقط .
والحمران توفوا كلهم عند الموازين ولم يعقبوا أولاد الا مسحل ابن كليب فقط .
وابن عمهم مسحل بن كليب ابن عويض ابن فهيد ابن ملفي ابن مسلم ابن ميزان كان يتيم الأب من يوم كان صغير والذي رباه بعد وفاة ابوه هم الاخوان الثلاثة .. وبعد حلف الاخوان أصابهم مرض الجدري واحد ورى الثاني واللي دفنهم كلهم مسحل بالمدينه المنوره
الشي هذا ما عليه كلام .. لانه وداهم يعالجهم , بسبب أن ديار الموازين ما فيها طب شعبي مثل المدينه وماتو هناك ودفنهم كلهم ..
واللي راح للحروب مسحل ابن كليب يترزق الله على زمن الفقر والجوع وقعد هناك أكثر من خمس سنين , وبعدين رجع للموازين وبقى هو وعياله الى اليوم .
وحمد الحمر ..
كان له ولد واسمه مرزق ..
ومرزق انذبح عند ابله وابل خاله .
وبنته حميده تزوجها قحم لكن لا اعرف اسمه بس اللي اعرفه انها
جابت منه ولد وثلاث بنات .. والولد اسمه حمود يسكن بثرب رجال شايب
وحميد كان عقيم ..
وحامد جاب بنت وماتت وهي صغيره وما جاب احد غيرها
اما مسحل فقد مات وكان عمره متعدي المية سنه لكن اشتهر بالطيب
والكرم والشجاعه وأبنه مسحل انجب خالد ابن مسحل , وسعيد ابن مسحل .
يقول .. سالم بن هرسان الجباري .؟
يانجد فيك رسوم للطيبيني = حمد وحميد وفارس القوم خضران
وخضران هو خضران المطرقه الديحاني
ويقول شخص عتيبي ,, ولكن ما اعرف اسمه
أرديبنا ورد القطا للمشاريب = وخصيبنا الحمران بأي مكاني
وفي اللي يقول ..؟
واشيب عيني يوم حمد الحمر مات
وهاذي قصيده حمد المشهوره
وناقتي فا الذود ماهي غبيه = في ذود ابن عصاي ملحاً اخياري
تصرف على الخطار والأهليه = لين الحقو برش الحيا بالخضارا
تصرف عليهم بالليال القسيه = ان لاذت الأسعار والسعر طارا
غدو بها الضفران غصبن عليه = ماهي عطا مني خذوها اجهارا
غدوبها الي يحتمون الونيه = مسعد وربعن كلبوهم اخيارا
أوفيت ماجوب الجريدة عليه = يوم السهوم ايقصفن العمارا
أوفيتها بمسلبن في ايديه = بارودها النقريز شغل النصارا
مضرابها خل المناكب شظيه = ومضهارها حوز الحقب من يسارا
ومن غاب عني ماالحقه مشرهيه = لومي على الحاضر مسوا العذارا
العفو ليت اصقير يوح الوحيه = ويشوف يومن اشهب الملح ثارا
وعـــواض زبـن الي ذلوله رديه = واحراص بن ناجي امنجي الثبارا
وياناقتي صيحي لهم بالحميه = وشبي لهم فا اعلا قرا كشب نار
صيحي لربعن يحتمون الونيه = لطامة العايل نهار المثارا
أرجي العوض من عند جزل العطيه = من ذود مصلاحن ينوس الخضارا
نقطع عليها العبله القيهميه = عكفان الأيدي فوق وسق الحرارا
ومن غاب عني ماالحقه مشرهيه = لومي على الحاضر مسوا العذارا
لومي على الحاضر .. وكان يقصد رجلان
واحد منهم اسمه هضيب كركش والثاني ما اعرفه
وعسى الله يرحمهم كلهم ويسكنهم الجنه يارب
ويرحم ابوي واخوي وجدي وجداني كلهم
وهاذي قصيدتي في ابوي
مرحوم يا عودٍ تنومس وهو حـي = أضفا على ستر المراجـل عباتـه
أحرص من محمد على سمعت دبي = وأكرم من معزي مسيـرة حياتـه
أقفى مثل حاتم وربعه مثـل طـي = تصعب على عصم الشوارب صفاته
صارت حياتي بعد موته ولا شـي = ياليت مـت ولا سمعـت بوفاتـه
أنشهد أني ضامـي وشوفتـه مـي = لا ناحت بصدري بقايـا وصاتـه
الله يبيح الشمس في غيبـة الفـي = والليل ضيع فـي عيونـي بناتـه
يالله عسى مزنٍ بروقه لهـا ضـي = تمطر على قبـره ويظهـر نباتـه
أنا بجاه الخالـق البـاري الحـي = الواحد اللـي مـا تعـد أحسناتـه
يغفر لعودٍ ما لحـق فطرتـه غـي = يشهد له المسجد وتشهـد صلاتـه
وتشهد له اللي قلبها بالزمـن نـي = ما جربت مـر الزمـن وشهواتـه
تقول أبوي وقلت أبويه يجي شـوي = صغيـرةٍ مـا خبروهـا بممـاتـه
لا ناظرتني كن تكوي الحشا كـي = فيها من عيونـه وريحـه وذاتـه
ما تدري أن العود وصابهـا هـي = قبـل يوادعنـي وأقبـل شفـاتـه
الله يبيحه والعـرب مـادرت فـي = أني يتيـم ومركـب الحلـم فاتـه
وصلوا على محمد وخلو هل الغـي = المصطفى اللي جمـل الله سماتـه
وهاذي قصيده بخوي
يالله يالرحمـن يـا خيـر معبـود = تجبر عزى اسنينٍ تطـاول نكدهـا
من عقب ما قفى عضيدي على الكود = وانا عيوني ما برت مـن رمدهـا
هاذي ثلاث اسنين عن راعي الجود = حدر الثرى اعظامه تزايـد همدهـا
عصريت الجمعه تعزويت يا سعـود = عبدالله نفسه غـادرت عـن جسدهـا
وسالت ادموعٍ جاوبت دمعة العـود = اللي سجـد واقـدار ربـه حمدهـا
وانا تقـول بخافقـي شـب بـارود = يحـرق معاليقـي وكبـدي لهدهـا
ورضيت باللي بكل الاحوال محمود = اللي كتب لأرواح خلقـه وعدهـا
اللي على عرشـه رجينا بـه الفـود = هو العوض للي غـدا فـي لحدهـا
عبدالله اللي يكسب الطيـب وبـزود = والنفس في درب الردى ما قردهـا
عند العرب محسوب لا صار موجود = ولا غاب ينقص بالجماعـه عددهـا
ياليت سـده بالقبـر كـل مقـرود = اللي نعـم رب الخلايـق جحدهـا
صحيح راعي الطيب لا مات مفقود = ولا الردايـا فموتهـا مـن فقدهـا
عساه عن نـار الزمهريـر ملـدود = وعساه بالفـردوس يطعـم شهدهـا
ويالله جنب خطوتـي كـل منقـود = وجنبني ارخـومٍ عماهـا حسدهـا
وتجعل لفعلي عند الاجواد مـردود = وانـوخ أجمـالٍ تهـادر زبـدهـا
واصبح دوى عودٍ من الوقت ملهود = وعوضـه شيبـه وفجـوت فهدهـا
وصلاة ربي عداد ما هبـت النـود = علـى النبـي الهاشمـي معتمدهـا