قصيده رثاء بالشيخ علي بن جزاع العجل رحمه الله

من يسندن عيت تشيلن عظامي *** من يسندن تكفون راجت بي القاع
حيلي رجف ماساعفن في قيامي*** وقلبي عطب به صاعق العلم والتاع
يادمع احسك دامي ومنت دامي *** ومعك الوجع ماهو مثل كل الاوجاع
لا ياعلي يامسندي ياحزامي *** معقول تمشي قبل اصافحك بوداع
ارجع دقايق بس اشوفك امامي *** بابوس راسك صبر لاتمشي بساع
ارجع دقايق بس اشوفك امامي *** بحكي لك بفرقاك وشلون الاوضاع
واقول لك انك من الناس سامي *** معدن رجوله نادرن بين الانواع
واقول لك انك ياوليده عصامي *** عن المبادئ ذدت يانسل الاسباع
واقول لك انك عقالن بهامي *** يا بوي باللي منزلك بين الاضلاع
واقول لك انك ملكت احترامي*** وجه الرضا حلو النبا ذرب الاطباع
وان اخنقتني عبرتي عن كلامي *** ابحظنك واشبك بك اذراع بذراع
لحظه فراق وصالي الحزن حامي*** واشلون عقبه ماتزلزل بي القاع

الشاعر:عايد رميض الشمري