تدري وش اللي يقطع القلب باللذات= لصار صدر اللي تحبه شمالي
لاقلتله وش هالبطا قال هيهات=ماهو بطا عدة اشهور وليالي
وانا علي اتمر ساعه وساعات=كني قضيت العمر كله لحالي
والبارحه من فوق كبري عرافات= اجريت من باب الفضول اتصالي
وجددت مع ذيك الهنوف العلاقات=بنت الرجال معربين الخوالي
اللي لها كل الغلا حي مامات=انا اشهد انه ترف الاقدام غالي
اليا طرالي اكتم الضيق بسكات= وصير من كثر الهموم انعزالي
من سبتك يابو الرموش الضليلات=ياللي ملكت القلب وهلكت حالي
من زود ماحبك عليه علامات= اكبر دليل اني اسولف لحالي
وتدري وش اللي يحرق القلب باللذات=صدري حجازي وانت صدرك شمالي