مرثية الراحل الاستاذ عواض بن نور العقيلي رحمه الله

يامل قلب بيحّ الصبر خافيه= ولاعاد يقبل للعزا والمواساه
مابين همٍّ خالق الكون يجليه= وكسّر خفي يصعب على العارف ادواه
ياصاحبي ماكل من مات نرثيه=ولاكل شارب لاتوفا بكيناه
نبكي على اللي راهياتّ هقاويه=من خلقته لين ان ربي توفاه
عواض مات وكل الاجواد تبكيه=جعل النعيم وجنة الخلد مثواه
بــ اول صفر بالتاسعة من الياليه=اصبح عليه الصبح والليل ممساه
اثر الخوي مهما تحبه وتغليه=تزداد عندك قيمته بعد فرقاه
وتطرب لذكره كل ماحل طاريه=وتتذكر اللي مر فيك انت وياه
ياعين يفداك السهر لوبكيتيه=و القلب لو يشكي الله مشكاه
والله ونعم الرجل واسئل مخاويه=انا الخوي اللي من الصغر ماشاه
هامة كرم ماكل يمنىٍ تجاريه=يوم ان كلٍ يذكر بفعل يمناه
اخوٍ وقف معنا بما تملك ايديه=بالراي والتوجيه والمال والجاه
وقفة سخا ماهيب وقفة مشاريه=يمنىّ تمد الطيب وقته وتنساه
مايفعل المعروف ياكود غير راعيه= والا الردي يقصر عنه ويتعداه
جف البحر والبر ضاقت فافيه= يوم ان ابو عساف غاب وفقدناه
قم يـ النديب الفكر هاجت طواريه=واركب على اللي كاملات مزاياه
عقبّّ عفيف وظلم وجه تواليه= واخذ السريع وحط رضوان يسراه
واقصر عن الطايف بعد ماتحاذيه=لاتاصله لف متيامن ادناه
السيل قدامك ياعسى السيل يسقيه=احرم من الميقات وادخل مصلاه
اسجد وقل لبيك يارب لبيه=وانو المناسك واجعل الامر لله
واصل طريقك مثل ماكنت ناويه=لين الهدى وحجز الشرايع تخطاه
وصلت سالم مـ انت محتاج تنبيه=يجيك سور المقبره لاتعداه
جنّب وادع ربك فبل لاتطفيه= زيارة الاموات حق ورضيناه
دور على قبره تحت حكم واليه=بين المقابر دوره لين تلقاه
عساه قبر(ن) منزل الغيث يكسيه =بروضّ خضر من جنة الخلد مجناه
ويمد له مد البصر في نواحيه=لين ان شوف العين مايلحق اقصاه
وصل على دربك تحيات مغليه= اللي بعد ماغاب عن دنيته تاه
قله رحلت ولابقى شي نخفيه=ابوحمد من غيبتك مل دنياه
من بعد موتك قام كلن يعزيه=وكثر العزاء دايم يزيد المعاناه
وادخل حرم مكة وحذ عمرتك فيه=بين الطواف وبير زمزم ومسعاه
واصل على بحر العروس وشواطيه=ملفاك شبلّ بيت عواض مرباه
عساف ابن عواض محدن يوصيه=لاكن من الباب الغلا عندنا وصاه
قله ترا ما ماجيت من باب توجيه=ولاجيت من عواض باخر وصاياه
غادر فقيد مطير وانت العوض فيه=ولاهو بعيد تصير مثله وشرواه
ومن شاور العاقل لقى من يقديه=واللي سئل مثلك عن الدرب مخطاه
والحق تعلو هامته وانت قاضيه=وحولك رجالٍ توصل العلم منهاه
اقصد عيال العود نور وبنيخيه=رجالهم فالمرجله ماله اشباه
خذ رايهم في كل شيّ تسويه=ان ماحصل لك خير ماجاك ماذاه
هذا كلامي لك وخذ عاد باقيه=اخوانك اخوانك بحاجة مراعاة
ترا اليتيم اعلم يبى من يراعيه= اليا بكى ماهو مثل غيره ابكاه
يطري عليه اللي من اول يشكويه=ان جاه يشكي شي مارد شكواه
احرص عليه ودور اللي يسليه=ينمو على حبك ولاعاد ينساه
ترا الصغيران جيت بالطيب تشريه=واخوانك اعدل بينهم بالمساواه
(تسعة صفر) ذكرى لجرحٍٍ نعانيه=يومٍ لك الله خلّّد الموت ذكراه
كان الحزن مستقبله مثل ماضيه=والله لـ ندفن كلنا مانسيناه
يـ الله يلي ميت الخلق يحييه=ولا دعاه العبد ماخيب دعاه
عواض بـ الفردوس الاعلى تهنيه=برحما ك يامن تاسع الكون رحماه

يسر مؤسسة صوافن للانتاج الاعلامي والتوزيع ان تقدم لكم
اولى قصائد الباقة السنوية الاولى للشاعر عبدالرحمن العقيلي 2014
(تسعة صفر) قصيدة رثاء في الاستاذ/عواض ابن نور ابن العقيلي رحمه صاحب الفضل بعدالله في اصدار الديوان ------------------والذي تم طرحه في الاسواق قبل وقتٍ قصير توفي ابن نور اثر مرض في الكبد مساء يوم الخميس 9/صفر من العام الهجري 1435هـ في محافظة جده عن عمر يناهز الـ50 عام وتمت الصلاة عليه في اليوم التالي الجمعه في الحرم المكي الشريف ودفن بمكة المكرمة ساءلين الله تبارك وتعالى ان يتغمده بواسع رحمته ويسكنه فسيح جناته