شاعر يمثل الشعر الحقيقي

السلام عليكم ورحمة الله وبركاته
اما بعد..
الشعر الذي لايتكون من معنى وفتل ونقض لايسمى شعراٌ يسمى بمفهومنا العام(سواليف) والجمهور المتذوق للشعر لايبحث عن السواليف بل أنه يبحث عن حلاوة الشعر الحقيقي الذي يمتلكه الشاعر عبدالله غازي(سوار الذهب) وكثيرا من الشعراء ولكن عبدالله يمتكلك قوة المعنى ودفنه الى الاعماق
وللأسف الشديد نرى أن الكثير من الجمهور لايعطي الشعر حقه ولكن يبحثون عن الشعر السطحي(كلام)
مارأيكم بهذي الابيات لو اننا تعمقنا في معناها لتذوقناها اسمعوا:
يقول عبدالله غازي:
عد نون نوض برقه واشتباك ارعوده**يصحي اللي مايعرف المزن والرباني..
مرحبا مـال الفتيل الا شــرار ازنـوده**والـبـرى مــردود للـحربي وللميــزاني..

هنا ندرك باان الترحيب ليس ترحيب مجاملات بل انه ترحيب تحدي وميدان اكون او لا اكون

ورد عليه الشاعر الكبير راشد السحيمي:
في البدايه رحبوا بالعالم الموجوده**والرعد والبرق خله فالكلام الثاني..
البقا يااصحابنا كلن يعرف حدوده**وانت لادورتني ياصاحبي تلقاني..

عبدالله غازي:
ماهدمت العد يوم اني لقيت اوروده**وانت يالضميان مانت مصدرن ضمياني..
حرب في روس الحرار السود مثل السوده**الله انه ينصر المسلم على النصراني..

راشد السحيمي:
الدروب اللي تودي يمكوا مسدوده**والبيوت الناس تدخلها مع البيباني..
لاتذكرني بذيك الحره المقروده** انعرفها من قرى الحره ليا باضاني..

عبدالله غازي:
انت راعي الوادي اللي مايدخن عوده ** لو رعاه الاجودي ماحافه القوماني..
الغشيم اللي يدينه يجرحن اخدوده**يشتريه العبدلي ويبيعه القحطاني..

راشد السحيمي:
صح راعي الوادي اللي حاضرين شهوده** لاتواخذني ياراع العود ابو دخاني..
الغشيم اللي لسانه للجحيم يقوده**وان تبعت السالفه يالله لاتبلاني..


عبدالله غازي:
منهو اللي نيته ماهي على مقصوده**فالبلد سلطان لاتشقح على السلطاني..
اليمن ماأخمل عليه الا خراب زيوده**ا نت ياللي منسلك فالمسلك العلماني..

راشد السحيمي:
كلمتك هذي بدون مواخذه مردوده**انت مايمديك يامهد الذهب تنساني..
الجبل من يمكوا قامت تصيح قروده**روح علم صاحبك ياهدهد سليماني..

عبدالله غازي:
كيف اداوي يالسحيمي عينك المرموده**ان كتبك الساحلي علم عليك عماني..
احفر القبر الهلالي لين تلقى دوده**والطريق اللي عليك يجيبني وداني..

راشد السحيمي:
لا تداويني تحسب العاقبه محموده**انت كلك خش من برى ومن دخلاني..
:::::::::::::::::::::::::::::::::::::::::::::::::: ::


هذه هي المحاوره التي يجب من جمهور الشعر ان ينسب اليها وكثيرا من المحاورات لشعراء اخرين فيها المعنى..
وهذي وجهت نظري تقبلوا تحياتي والسلام عليكم وحمة من الله وبركاته......

يعطيك الف عافية

لله درك يابو غازي بدون قصور في راشد

لاهنت اخي المقام السامي وكلامك في محله وعبداللة بحر وترى ابياته مميزه وقويه
البدايه حريقه وهذي ميزة سوارالذهب يحيي الملعبه كلام ضرب سلاح

تقبل مروري وشدة اعجابي

راشد السحيمي تخارج بدبلوماسية من المعنى القبلي :

( لاتذكرني بذيك الحرة المقرودة ) , وايضاً ( وأن تبعت السالفة يالله لاتبلاني ) .


وهو معذور في ذلك .




بيوت سوار الذهب تمثل روح الشعرالحقيقي الذي لاتجد له شبيه في هذا الزمن :

( لو رعاه الأجودي ماحافه القوماني ) بالفعل لوحماه الأجودي لما وجد القوماني الى هذا الةوادي سبيل لكن الاجودي لم يرعاه .

( يشتريه العبدلي ويبيعه القحطاني ) تراكيب مبدعة بمنتهى القوة كقذائف الرصاص , وهذا الفارق بين البيت العادي والمقوّل والمستهلك وبين بيوت تقصف بعمق ومن بعد .

بعد أن يئس سوار الذهب من دخول السحيمي معه في هذا المعنى وانه يتهرب من الدخول فيه قال له :

( أحفرالقبرالهلالي لين تلقى دوده = والطريق اللي عليك يجيبني وداني ) ابحث عن الماضي والتاريخ وسيخبرك عن واقع وماجرى لأجدادك الساكنين في القبور .