واصرم قلبي صرم عشب المقيضه = مع شوبة الكنه وحمـٌـــو الطواليع
إنزاح مرباعه وشمسه رميضه = وغير السموم أرذاه عج المخاويع
من عقب ماظلت فياضه رويضه = ماعاد تشبع به فروخ الجرابيـــع
على الذي يهتاضني وأستهيضه = هايم غرام مولــــــــعٍ فيه توليع
خده سنا برق المزون المنيضه = برقٍ تلالا فالسحاب المهانيع
نوٍ على سيله يعلّـــــــم نفيضه = يشيل نابي طوبة الحزم ويتيع
لاهف حشى ماله وصوفٍ بغيضه = أشتاق له سيد العذارى المفاريع
ماأنساه لو أنسى صلاة الفريضه = وانا الذي ماأسمع بحبه ولاأطيع
وإن كان مالي فالبخوت الحضيضه = ماظنتي عقب المفــــــارق مراجيع
وهنيكم ياأهل القلوب الفضيضه = ياللي تردون السوالف مصاليع
ماتعرفون المبهمه والنقيضـــــه = ولاأسقتكم الفرقا المراره قراطيع
ماصابكم حر المفارق مضيضه = وانا على جمرة مفارق وتوديع
غير الجروح النازفه والنجيضه = أجاذب الونات فالصدر ماذيع
أجبر عزاي بدمع عيني وأفيضه = وأواسي الخاطر بذكرى وتشفيع
ذكرى رجاي اللي عروضه عريضه = قدام لايقبس فتيل المقامــــــــــيع
وأخاف من سود القلوب المريضه = كبار الدفوف مولدين المضاريــــع
ياوقت سافر بالحمول البهيضه = لاتذنب النفس البريه بلا طيــع
ذنبك على النفس البريه غميضه = مافيك لاسره ولابك منافيــــــــــع
مالك على مشهاة الانفس رفيضه = لاتوقد الفتنه بطق الاصابيـــــــــع
خل الهوى يسمع لركبه نضيضه = ياخذ على رمل الصحاري مراميع