عبدالله الميزاني(سوارالذهب)في أول ظهور بعدالحادث

معلومه عن الحفل

الشعار المدعوون سوار الذهب ملفي المورقي تركي 2000

وفيصل الرياحي الذي لم يحضر للحفل رغم ان حجزه كان اوكي

تعمدت ايراد هذه المعلومه للمساعدة في فك رموز بعض الطواريق:)


لعب في هذه الحفله خمس طواريق

وهي كالتالي

1)عبدالله الميزاني مع ملفي المورقي

2)ملفي المورقي مع تركي 2000

3)عبدالله الميزاني مع تركي 2000

4)ملفي المورقي مع عبدالله الميزاني

5)تركي 2000 مع عبدالله الميزاني


الطاروق الاول

عبدالله الميزاني مع ملفي المورقي

عبدالله الميزاني

مرحبا عند ربع يزبنون الدخيل=عزوة تنطح العدوان وتضيمها
ياالله انك تديم افراحنا كل ليل=قبل لا تاقف الساعه على تيمها

ملفي المورقي

البقاء عن رجال يكسبون الجميل=والتعاليم توخذ من تعاليمها
جارنا الله من الاقدار وقت طويل=والمشاكل يزيح عن العرب غيمها

عبدالله الميزاني

ياهل السيل يالي شربكم سلسبيل=ويلكم من عذاب النار وجحيمها
طبع الانسان مايخلق لك المستحيل=ماتعز الرجال الا بتكريمها

ملفي المورقي

خابرن جنة خضراء وظلن ظليل=نعمة تنعم الاجواد بنعيمها
يتعب الرجل لين انه يضوي حصيل=مايطاوع هوى نفسه وتوهيمها

عبدالله الميزاني

هل مزاجك من الكافور والزنجبيل=بين تأخيرة الدنيا وتقديمها
أوزن الكيل بالمكيال يالي تكيل=لاتزعل معازيبك معازيمها

ملفي المورقي

حجتك حجة بيضاء وعندك دليل=مار الاعمال دايم في خواتيمها
مافقدنا كثير ولافقدتوا قليل=والعلوم المباحه ليش تحريمها

عبدالله الميزاني

أنت نرضيك بالواقع ومن ها القبيل=بس سيب هل البصره وتنجيمها
لا تولع فتيل ولا نولع فتيل=والمخيله رعدها سابقن ديمها

ملفي المورقي

قتمة عن عباد الله عساها تزيل=أزعجتنا يابن ميزان بوحيمها
الامانه على المخلوق حمل ثقيل=قلت لك سينها واعجل على جيمه

انتهى الطاروق الاول

الطاروق الثاني
ملفي المورقي مع تركي 2000
ملفي المورقي

سلام تسليمن يعم الموازين=جيران وأصحاب عزاز وعواني
لكن سرى الليل ياتركي ألفين=وبيني وبينك طيبات المعاني

تركي 2000

يامرحبا ترحيبتن فالها زين=من صافي النيه ومنطق لساني
عطني علومك والخواطر دواوين=لكن عشرك لاتعود ثماني

ملفي المورقي

مدر البعير الي توجه على فين=هذي طبيعه فالبعير العماني
علامة ياصاحبي بين قوسين=ماظن تمحها ظروف الزماني

تركي 2000

ماني بجناين لبعض البعارين=ألي ماتمشي غير بالخيزراني
لا والله الا ساع ماشافة العين=وأستر بالي ياطويل اليماني

ملفي المورقي

ماراح فالجمعه يجي يوم الاثنين=ويصير له عند الجماعه مكاني
أقول لك من صبح وتقول بعدين=أنظر بعينك وأستمع با الاذاني

تركي 2000

لا أقفيت ماني تابع للمقفين=لوكان أعدك واحد من خواني
العلم عندي يالرجال المسمين=أخذه وسلم لي على أهل المحاني

ملفي المورقي

العاطفه تاخذك والرفق واللين=لين الرشاء اقفت به ظهور المحاني
مال الامانه غير ناس موامين=ماتنعطي ياصاحبي شخص ثاني

تركي 2000

كلمتك هذي ماعليها براهين=لوكان ياملفي تزف التهاني
بكره ليا ثارت عليك البراكين=ضاعت علومك كلها في ثواني

ملفي المورقي

أقول عان الجدي خير العناوين=وأتقول لا بالله سهيل اليماني
نجمن يطوع ماردين الشياطين=ماهو غريب انه يشيل المباني

تركي 2000

العام سيفي ضاع بين السكاكين=واليوم سيفي يابيض الوجه جاني
ترى السنه عيدين واليوم عيدين=عيد كما الاضحى وعيد رمضاني

ملفي المورقي

وشلون سيفك مع سيوف السلاطين=الي مضاربها تقص المثاني
الله يثبتنا على الحق والدين=دنياك هذي ماعليها ضماني

تركي 2000

يالمورقي وليت واحضك الشين=حتى أيش لو تصهل صهيل الحصاني
علم بني حضرم تصك الدكاكين=ما عاد ينفعهم فلان وفلاني

انتهى الطاروق الثاني

الطاروق الثالث(تركي وعبدالله)
عبدالله الميزاني

يا الله الي عليك الحال والاتكال=أعقل الذاهبه وأرحم مداويرها
غن يابن عطاالله والمناقش جدال=من لقى عين زمزم من حفر بيرها

تركي 2000

المخاليق في حكمة عزيز الجلال=يوم الايام ماتومن مقاديرها
المناقش ماهو ممنوع بين الرجال=وأنت عندك علوم مانبي غيرها

عبدالله الميزاني

الفلك مهد مابين اليمن والشمال=بعض الايات مايحتاج تفسيرها
مايكثر شحمك الا الطعام الحلال=مايغش الطيور الا حناجيرها

تركي 2000

طال صبري وانا دورك والصبر طال=واتعبتني جهينه مع مشاويرها
ياموصي عسى عندك من المال مال=شر الايام لايضحك على خيرها

عبدالله الميزاني

نوب أنا أزعل عليكم واقطع التصال=اكره الدبدبه وأكره معاصيرها
أنت ياحلو ماتبلش على كل حال=كل مألغي قناه تعيد تصويرها

تركي 2000

الزعل وش تبي به ياكريم السبال=خلها تمشي الدنيا على سيرها
مايشيل الحمول الا ظهور الجمال=يوم بعض العرب تبدي معاذيرها

عبدالله الميزاني

صاحبي مايشجعني على الانفعال=والروافض يجيز الشرع تكفيرها
ماتت أم البنات وعاشت ام العيال=علم البدو لاتتعب مظاهيرها

تركي 2000

أنت أشوفك تحسب أن الحقيقه خيال=لو تعبر بها يتعبك تعبيرها
لاتزال الهقاوي دونها لاتزال=والملفات ماسحبة تقاريرها

عبدالله الميزاني

أطول ايات قرن الثور ولا الغزال=والامارات تضحكني مناصيرها
أنت موقوف بين الشك والاحتمال=يعني القدس مايعنيك تحريرها

تركي 2000

لو تعرف الاجابه ماطرحت السوال=مايغش العقول الا تفاكيرها
كان ودك تجاهد يابن غازي تعال=أعمر القدس ولا زيد تدميرها

عبدالله الميزاني

لاتصب الغروب ولا تلف المحال=لعنة لليهود ولحم خنزيرها
اشهد أنك ولد صاحي ومضرب مثال=يوم تتعب على الكلمه وتكريرها

تركي 2000

لو الايام تكشف غيب سود الليال=كان ماغنة الدنيا على زيرها
لو أعدلك أظنك ماتحب العدال=كل غبة بحر ترمي بوابيرها

انتهى الطاروق الثالث

نقله لنا اخونا هامور مطيري (منتديات مطير) وقمت بتحريره



أبن مصاول

محاورة روعه بين ابن غازي وابن عطالله والمورقي ملفي ..

والحفله عند واحد من ربعنا الغمان من القحومه ..

وابن غازي ابشركم احسن من الاول ومتغير 100%.. وابدع ..

ولازلت اقول الخيل الاصيله لاتلحق الا تالي وهذا ابن غازي والوعد قدام يامطير..

وتسلم يمينك يابو ضيف الله على النقل لاهنت ..



سلطان الميزاني.

اقوول والله محاوره ولا احلى منه

وبعدين عبدالله متغير صار احسن من الاول


والشي الثااني على هذا المحاوره اقول لعبدالله وتركي خلكم كذا

ممحاووره اجمل احلى واحسن من الساابق



مشكور يابن مصاووول



يعطيك العافيه

الله يطول عمر ابو غازي ويحفظه عزالله أنه شاعر هرم,,,,,,,,,,,,,

الا انت وين انت مبطي ما سيرت ولا مريت على بني عمك فالمنتدى ياميزاني الشرقبة...........ياخوي عسا ماشر........
ترا وجودك ضروري يالذيب معنا.........

اخوك..........مايهاب

الظرووف ماسمحتلي لحد الان اني ادخل النت عموما ...... وإلا مشتااق لكم بالمررره لكن انتم شدو حيلكم واذا زانت الامور بكون اولكم ............ والله يعطيكم العافيه

ابن مصاوووول مبدع مبدع

كل الشكر لك ع نقل المحاوررره


تقبل مروري ووووودي

المشاركة الأصلية كتبت بواسطة سلطان الميزاني

محاورة روعه بين ابن غازي وابن عطالله والمورقي ملفي ..

والحفله عند واحد من ربعنا الغمان من القحومه ..

وابن غازي ابشركم احسن من الاول ومتغير 100%.. وابدع ..

ولازلت اقول الخيل الاصيله لاتلحق الا تالي وهذا ابن غازي والوعد قدام يامطير..

وتسلم يمينك يابو ضيف الله على النقل لاهنت ..



سلطان الميزاني.

حياك الله يا ابو عبدالله وسرني مرورك وتعليقك والتنبيه بأن الحفله عند الغمان ربعنا ....

والله يبشرك بالخير بأن طمنتنا على الرجال وانه متغير وهذا اللي حنا نصحناه به في كل المنتديات وقلنا يجب على أسوار الذهب أن يغير من أسلوبه ولم نقله إلا محبة به ولإنه يعنينا ولإنه شاعر كبير المفروض أن يحبب الناس فيه وأن يكسبهم فكل مبدع بدون جمهور لاشئ ...


احسنت يا أبو عبدالله ولا هنت على المرور المميز كما عهدناك دائماً...


أبن مصاول