كنتي أجمل في عيوني والغريب.=ماقهرتي ابليس بعيون الصواب.
تطعنين القلب يرفس بك صويب.=وتدخلين بْشرّ في وجه السحاب.
رغم بعــدك ماسرى يمـك نحيب.=ومايشوفك غيـر وجهين الكتاب.
لـو ينــادي القلب حُمره للمغيب.=كذّب عيــونه وصدّق لـه سراب.
لو سراب الوقت للضامي يجيب.=كيف ترويني عيـونك من غياب.
لو نشدك الشوق بلسان اللهيب.=ذابت حْروفك وعرق القلب ذاب.
ولوسألت الود عن حال الحبيب.=نظرة عْيون التعب تكتب جواب.
والحنــان اللي على قلبي رقيب.=اشتغل عــــداد عمره لين شاب.
لا تقول الشــوق يذبح لو تغيب.=شوفني شـامخ وفي قلبي عتاب.
مايهم القلب جــرح ٍ مـــا يطيب.=يكفي إني ذيب تخضـع له ذيـاب.
لو عوى فكـري وجريت القنيب.=تجفل اسبــــاع الفيافي والعقاب.
فــارض ٍ نفسي وظني ما يخيب.=هقوتي تشرب من الغيم الشراب.
ما طرقت القاف لعيـون الغريب.=وكم غريب ٍ يلبس ابيـاتي ثيـاب.
اكتب القيفان وارقب لي حسيب.= كـل حرف ٍ نرتجي منه الثواب.
إنتهينـا والزمــن جرحه عطيب.=وافتــرقنا وانتي بْوجه السحاب.