ياالله انك لا تعود العسكريه [محاااوره]

الشاعر عواض العطشان الشلوي

من أشهر شعراء قبيلة الشلاوى قال هذه القصيدة قبل حوالي سبعين سنة

حينما انتظم في السلك العسكري

وحيث أنه بدوي ليس متعود إن يأمره أحد قرر أن يفصل وقال هذه القصيدة

التي كثير من الناس مايكررها دون أن يعرفوا من قائلها :


وهذه قصيدته

يالله انك لاتعود العسكرية=والزمان اللي على البدلة حداني
لبسوني لبسة ماهيب ليه=درعوني باللبوس المشبهاني
دربوني مثل تدريب المطية=والصعب منا يعود مطوعاني
العريف المستلم طبق عليه=والخفارة طولت والنوم جاني
يالله انك لاتحملنا رزيه=حيث حنا للمعاصي مانداني
يا وجودي وجد حُمُراً عيدهيه=ساقطاً منها الحقب ويا البطاني
فوقها قرماً بباكوراً قويه=من وراء العارض يبا دار اشهراني
قطّر القربه وقدم قيهميه=مع زوال الظهر يوم الشوف داني
هسها العرقوب والديره رديه=لين دم الجوف بالذرعان حاني
او وجوده وجد عَرَباً فوق طيه=في لهيب القيض معطيتن ثماني
هملن اعيالهن بارضٍ خليه=واصبحن اعيالهنه ذيهاباني
يوم جن البير ليهي جاهليه=ماعليها لا ورود ولامحاني
بركن بالشمس تصهرهن شويه=كل منهن كنه الخرص العماني
لو بغيت ادله الطاري عليه=واستحس القلب والهاجوس جاني
يوم اشوف الدين مرتجدن عليه=والظهر عريان والجوع ايحداني
طالباً رزقاً تحطه في يديه=ماعلى بابه شريف ولاهداني

وهذا رد الشاعره الشمريه على قصيدته

وسِّع الملعب لقاف الشمريه=وسّعه للحق أنا بطْلِق عناني
خلني لا تْحِط قيدك في يديَّه=ولَّعَتْ ألفاظ شعري و المعاني
جمرةٍ كتمانها صعبٍ عليّه=كل شاعر لا كِتم شعره يعاني
يشتِعل من شان يسْتهدي بضيّه=كلّ طرقي في دروب الليل عاني
هزّني شاعر سمعتَه في عَشيّه=( عسكريٍ ) يشتكي مرّ الزمانِي
قال ( ربي لا تعود العسكريه )=( و الزمان اللي على البدله حداني)
قلت أكيد الرجل واقع في بِليّه=أو مصيبه صكِّته بين المحاني
قال وشو ( درّبوني كالمطيّه )=و اتِضح مقصود شعره لي وِ بانِي
طار قلبي و أثري الدعوى كِذَيَّه=ما أقول إلا يا دانه داني داني
استلمها جَتْك نِصح اختٍ لِخيَّه=ولا أبي من وقتك إلا لي ثواني
قُمْ وِ صلي و اردع النفس الشِقيّه=و احمد اللي يرتجيه إنسٍ و جانِ
الله اللي مدّ لك رزق و عطيّه=حرِّك بحمده يدينك و اللسانِ
كان شغل (العسكري) متعب شِويَّه=قبلك اللي من التعب عضّ البنانِ
الرجال اللي يخوضون المنيّه=كلّ صعبٍ يَحْمِلُون إلا الهوانِ
إسأل الصحراء وِ صمت المهمهيّه=عن فعايلهم وِخِذْ منها البيانِ
كيف شقّوا بالصخر مجرى وِ مَيّه=كيف عاشوا مِعْ ذيابتها بأمانِ
صادقوا في مشْيُهم شمسه وِ فَيّه=وِ عْقِدوا مَعْ برّده و قيظه رهانِ
كلّ من له نفس صبَّاره و حَيَّه=بإذن ربي يقطف ورود الأماني
لا تِشَكّى ... أشهد إن العسكريه=غِصن رزقٍ وارفٍ رطْبٍ وِ داني
كَمِّ بيتٍ من وراها شبِّ ضيِّه=يغْرِفون اللحم دايم بالصواني
و كم راسب بالفصول المدرسيّه=ما لقى في غيرها رزق و مكانِ
( جندي ) و راتِبْه خمسُ وكم ميّه=نعمةٍ ما يجحده غير الجبانِ
اضربوا ( للعسكري ) أحلا تحيّه=لَوْهُ ( جندي) أشهد إنه راعِ شانِ
حَيِّ (عَينه) لا غَفتْ عين البريّه=أسْهَرَه لجل الوطن حبّ و تفاني
اللي لا صِحْنا رمى ( روحه ) هديّه=يوم غيره من غلا روحه أناني
لا تلوموني بحب العسكريه=لو أغني دَهْر حُبه ما كِفاني
خيرها طَوّق بَعَد ربي يِديّه=رزق (ابوي) وْ شِغل (اخوي) بهالزمانِ
و أنا بنتٍ لا جحود ولا غبيه=و احمد اللي بالرضا دايم كساني
في ردودي دوم لي ب(النصح) نِيّه=لا طلب شهره ولا هو شي ثاني
عِنْد هذا البيت وَقَّفتْ المطيّه=وِ اكتمل ردي عسى المقصود بانِي

شويهينه الهيلا


دائما تتحفينا بماهواجمل





شكرا لك

شرف لي ياابن غلاب حضورك المتواضع والمميز وهذا يسعدني ويدفعني الي الجمل

الأخت العزيزه شويهينة الهيلا نشكرك على هذا النقل الموفق جداً..جداً صراحة قصيدة كنا نرددها ولكننا لا نعرف لمن؟ وينقصنا بعض أبياتها التي ربما عكسناها بسبب عدم حصولنا على القصيدة كاملة بل مما يتناقله الناس !!

صح لسان الشلوي وصح لسان الشمريه

طبعاً الشمريه <<<(إن كانت شمريه وليست شمري) جاء ردها متاخراً وهذا واضح من المفردات المستخدمه في القصيده وهي حديثه ولكن ردها جاء جميلاً جداً ولكن السؤال الكبير من هي هذه الشمريه؟؟؟ ولماذا يخفى أسمها؟؟

تقبلي شكري وتقدري على ما تضيفيه من روائع من ادبنا الشعبي

أبن مصاول

قصيده جميله بارك الله فيك اختي شويهينه الهيلا

مشككككوررهـ اختي شويهينه
على الاموضوع الجميل
وتقبلي مروري

يعطيك العافية اختي شويهينه الهيلا مبدعه دائما عيني عليك بارده تقبلي مروري

بارك الله فيك اختي شويهينه
جميل ماطرحتي
تقبلي مروري

تسلم يا بن مصاول دائما تدفعني الي الامام بكلامك الجميل وبنسبه لي اسم الشمريه لا استطيع وضعه محضووور نكتفي باسم القبيله
تقبل تحياتي

مشكورين بمروركم الجميل والرائع ياالضلع و عثمان بن صحران وجبر الخواطر
تحياتي