:: كنت أعمى فيك _ لا لا كنت ميت للنخاع ::

غير متواجد حالياً

لو خسرتك ماخسرت العمر والدنيا متاع ..
وأدري إني لو خسرتك ماخسرت إلا القليل ..
بس فكر زين تعرف من خسر فينا وضاع ..
وتعرف إنك لو تلف الأرض وتدور بديل ..
والله إن تبطي ولو لفيت في كل البقاع ..
ولو تسوي وش تسوي ماأنت لاقي لي مثيل ..
وين تلقى مثل شخصي شخص _ وأطباعي طباع ..
ووين تلقى مثل قلبي قلب _ أو مثلي خليل ..
البشر واجد .. نعم .. لكن فرق الإنطباع ..
يجعلك يمي تميل ويم غيري ماتميل ..
يارفيقي أنتبه وأحسن لي الإستماع ..
للمواقف دور في كشف المزيف والأصيل ..
وأنت ماقصرت فيني موقفك جدا شجاع ..
طعنتك في الظهر فعلا كانت إثبات ودليل ..
بيض الله وجهك اللي ساتره تحت القناع ..
ورايتك بيضا معاي وياعسى عمرك طويل ..
يعني أعطيك الثقه وتردها بلوي الذراع .. !!
ياخي ماشاالله عليك أبدعت في رد الجميل ..
مدري كيف أشكرك _ مدري كيف أرد الصاع صاع ..
كنت أحسب إنك عزيز النفس تطلع لي ذليل ..
كم وأنا عييت أصدق فيك قدر المستطاع ..
من غبائي كنت أسكت وأعذرك وأثر الحصيل ..
جرح قلب ميزته في كل يوم الإتساع ..
ودمع عين ينهمر من ضيقتي في كل ليل ..
والله إني كنت أحبك حب وأتبعك إتباع ..
كنت لجل أرضي غرورك بس أسوي المستحيل ..
كنت أعمى فيك _ لا لا كنت ميت للنخاع ..
كنت مدري كيف ...؟ لكن كنت صادق معك حيل ..
كنت أمارس في غرامي لك سياسة الإنطباع ..
وكنت لاغي معك فكرة أعتزل أو أستقيل ..
أندفعت بكل مافيني وسوء الإندفاع ..
يجبر الإنسان أحيانا يفكر بالرحيل ..
صدمتي فيك أنت خلتني أفكر بإقتناع ..
إن قتل النفس راحه لو أنا كنت القتيل ..
أنفجر راسي من التفكير وأزداد الصداع ..
كيف أنا بفتك من جرحك ودوشة قال وقيل .. ؟
صرت سيره في حلوق الناس وتالي هالضياع .. ؟
رحمتك يارب لامن ضاقت :أمنحني وساع ..
أنت حسبي في الزمان الجاير ونعم الوكيل ..
لاغدى مستقبلي والماضي أطراف النزاع ..
وصفحة الماضي سواد وشي من هذا القبيل ..
لازم أنسى لجل أنهي بداخلي هذا الصراع ..
ولازم أتقوى عشان أحقق النصر الجليل ..
وطالما إن الهجوم أفضل وسيله للدفاع ..
مستحيل أرضخ لو أن الحمل ياربعي ثقيل ..
والبخيل اللي نساني وأشترى فيني وباع ..
( يذلف ) الله لايرده والله بجرحي كفيل ..
وإن سأل عني وجاكم بعد فترة إنقطاع ..
علموه إني نسيته بس أنا ماني بخيل ..
طالما هو السبب في قوتي
_ قبل الوداع _
بلغوه أقل شي بخااااالص الشكر الجزيل