قصتى مع التجارة من طقطق الييييييين السلام عليكم

ضاق الصدر عقب صفقة السيارات وقعدت لي كم شهر مغير أدربي راسي إما شريت جوال وبعته بمكسب 100
هاك اليوم طالعن عقب الفجر وأشوف هاك الفوال إلي يحبه قلبك لوحته أصفر وبرتقالي واسمه عيون المها للفول وأنا إلي أطلب تاوه ومقلقل لحم وأشوف هالعالم مغير تطاق على هالفول ،، تقل لاكلت مو الفول ذهب
ويشبك عرق التجارة مع لقمة الفول وأنا إلي أصمل على مخبز وفوال واتوكل على الرحمن وأنظف صحوني وأمصمص هالخبيزات وأعطيهم الدراهم .. وأنحر البلديه قلت أبفتح فوال وش الشروط ،، قالوا جب شاهدين وتوصيه من الملك وخطاب موافقه من الأمم المتحدة وملف أخضر
لعنبو بليسهم عليهم شروط تقل فاتحن مفاعل نووي مهوب محل فول
حددنا الموقع وتوكلنا على رب العالمين وتوسطنا بواحدن في البلديه وجتني الرخصة من غير شروط
بلطنا المحل وبنينا التنور حق الخباز وشرينا صاجة المطبق وجرار الفول وكم مقلى على كم قدر على 10 اسطوانات وطقينا اللوحة إلي صفطت القرموشي على جنب
بهذلوني الدفاع المدني على ماعطوني رخصة ،، تقل الدعوه عندهم مرجلة ،، يجيني واحد يقول خل لي الغاز بلاستيك وحط الإسطوانة برا ،، وإلا مني سويتها جاني رفيدزه قال وين اشتراطات السلامة يا ابو الشباب حط الاسطوانه من داخل ومدد بمواصير حديد حطيت لكل واحدن منهم اسطوانه وقهويت واحدن منهم ويسرها رب العالمين وخذنا الرخصة ..
وأنا إلي يشخلني الأمل شخل ،، وأتهاوش أنا ونفسي ،، الفرع الثاني يصير في الخبر وإلا في جدة ،، ووش أسوي بالأرباح أفتح مشروع ثاني وإلا أزرع كشنه مرة اخرى وأروح يم الوالده قلت ياميمتى إن قاله الله لأحج بك لو الكعبة في سويسرا ،، وتشوفي للجرايد هاليومين ونقي لك حدا هالساعات ولا أوصيك قصي الإعلان وصفطيه وعقب كم شهر عطينياه وأبشريبها ياست الحبايب يا حبيبه
قالت وأنا أمك مابي منك شيء الله يجزاك خير أنت بس فكني من غثاك هذي عاشر غساله والسبة ثيابك وصراويك ياخوي أنت في ركبك مشاحم وإلا تداوم في بنشر وإلا ماتعرف تاكل ،، ياوليدي الله يصلحك ماهنا بقعة مابعد لقيتها في ثوبك ، تدري إني من تالي صرت أجمع أخواتك واقول إلي تعرف مصدر البقعة أبعطيها هديه الله يهديها أميمتي وش حليلها لكن لاعطيتها وجه قلبت عليك صن وكبتتها فوق راسك بعد
إيه يسر رب العالمين وطقينا هاك اللوحة وسميناه ( شيخ الجرة للفول ) ورحنا للبطحاء وتلينا لنا اربعة يمنيه مع رقابهم وفصلنا لبس موحد أحمر وأبيض وعليه نقوش تقول ثياب سراج سند الله لايكثر تصاميمه صارت الثياب تسنها جلابيات حريم
يوم فتحنا المحل ،، و إلا ماهنا ذاك الدخل ،، مغير ادفع رواتب هالثيران من حسابي على غير سنع
ونسأل أهل الرأي وأهل المعرفة ،، قالوا مالك إلا تفتح الخباز ويبي يرزقك رب العالمين ،، العالم ماتفك خرمتهم على الفول إلا مع تميس يحبه قلبك
ونلقى في البلد أزمة خبازين ،، أبي خباز منا وإلا منا ،، مالقيت ،، الله يخس هالأفغان مغير يتغلون إلي يقول أبي راتب 4 آلاف تقل يبي يخصب يورانيم مهوب يبي يرابط عند فرن وإلي يقول ما أعرف أشتغل على فرن أرضي أبي فرن في الجدار جعله يشمّع في جدار عجلن ما أبطى يالله يقشعونه منه إلا بعتله
قدمنا على فيزة خباز باكستاني ،، يوم إنهم فحصوه ويلقون فيه لوكيميا ( سرطان الدم ) الضعيف يقول بابا أبو ضيم أنا 19 سنه شغل في سعوديه مافيه مشكله أنت كلام أنا ،، بعدين أنا فيه سفر باكستان يجي سرطان ،، الله كريم .. قلت والله مهوب منك من محق البركة وأنا أخوك
ونختار واحدن ثاني وتضبط أموره يوم جا يستلم التاشيرة من وزير ستان وتسكر حكومة باكستان المكتب حقهم يقولون إن له علاقات مع طالبان <--- مستمر محق البركة
حاولنا منا ومنا وطلعت التاشيرة ،، يوم حجز التذكرة ويقصفون مطار وزير ستان ويخيس في ديرته شهر يوم إنهم فتحوا المطار وحجز التذكرة مره ثانيه وهو إلي يصدمه باص على دبابه وتنكسر رجله وفقرة في ظهره الضعيف ويدق علي يتعذر ،، خخخخخخخخخخ قلت والله مهوب منك يابعدي ،، أنا إلي أبتعذر مهوب انت ..
دبرنا خباز فنان وفتح المخبز وبدا المحل يشتغل وتضبط الأمور وأحط أول ألفين في جيبي ربح وتروح من باتسر مخالفة للبلديه يقولون ليش مافيه مكيف في المستودع ،، والمستودع فيه خياش فول
لعنبو بليسهم حنا مالقينا مكيف نتبرد به في القيظ نحط مكيف لخياش فول لادخلت المحكمة وإلا البلديه تطلع وثوبك تقل مغسول من العرق ،، والله إنك تقوطر وكل شيء فيك مترهل تمشي مفوحج من زود الحر ..
الشاهد من هالدندره إن الفوال بدا يشتغل ومشت الامور وأجي ذاك اليوم وإلا نجيب ( اليمني مدير المحل ) فاقن كشرته الله يخسه سنونه بينهن مشاكل متفرقات وطالعن له شعر في جفونه الله لايبلانا ولا منه تبسم ودك تخبز بفرادة العجين ويالله تبرد قليبك ،، يالربع والله إنه يسد النفس ،، قلت له يانجيب رح ياخوي عدل سنونك على حساب المحل وإلا بدلتك بلبنانيه ( لو العلم معك تسان الخباز زلمة بس رب العالمين داقمك )،، قلت وش عندك يا أبو يمن ،، قال جانا واحد وعطاني هالرساله لك
وأنا إلي أفتحها وإلاه راعي العمارة يقول إجارك بينتهي عقب شهر ونبيك تطلع أجرنا المحل على وكالة نيسان

وأدق عليه قلت يا ابو الشباب وش السالفة ،، أبعطيك زود ولا تطلعني أنا مسترزق رب العالمين يا اخيي ..
قال والله إن وجهك وجه خير يالاجودي ،، تصدق هالفتحات لي فترة منيب ألقى لهن مستأجر ولانيب أجرهن إلا برخيص يوم جيت أنت يالمبروك وتستاجرها نيسان الفتحة بـ 50 ألف
إيييه هون علي مصيبتي يوم مدحني قلت أجل اصبر شهر وشوي وطالع ان شاء الله وكثر من هالمدح بارك الله فيك وأمسك مقاول على عماريك ياشيييخ ،،
وأنا إلي أستخير ،، قلت هالمحل مامنه إلا الغثا ،، ويكفي إن حنا صرنا باب خير على راعي هالعماره واسترزق منها ..
أبسكره لوجه الله وندور الرزق في غيره ..
وأنا إلي انشر السالفة على ربعي ،، قلت شفتوا إنكم ظالميني هذاني صرت فاتحة خير على راعي العمارة ومحق البركة علي لحالي ويعتذرون مني وإلي ركبته حق وإلي صرت لا شفته أناظره بطرف عين
يوم إني عزلت وطلعت ويدق علي عقبها باسبوعين قال لعنبو بليسك نضلتني يالاجودي قلت وراه عسى ماشر يابوي ..
قال وقعت العقد مع نيسان لمدة 15 سنه قدام ،، وتجي الأمانه قالت إنك مخالف ماخذ متر ونص من الشارع مهوب لك ،، لازم تهد العماره وتبنيها من جديد خخخخخخخخخخخخ وعقدي من نيسان عليه شرط جزائي في حالة الإخلال أدفع لهم نص مليون وانت خابر على ما أطالبهم في ديوان المظالم أبتأخر على نيسان وبيغرموني ماكتبت يالأجودي
قلت والله إني داري وأنا اخوك إن فيه شيء غلط ،، لكن الحمد لله رجعت الأمور لمجاريها احمد ربك إنك ماجاك شلل وإلا ماتوا أهلك تراني ماكودت عليك في المحق ،، عطيتك من العيار الخفيف يالذيب

إيه راح المحل الله يخلف ولا حجينا بالوالده ولا جبنا لها الساعة ،، الضعيفه يوم جيتها عقب شهرين وإلاها متنقيه ساعة من الحميضي ما ودك إلا تناظرها قلت ياولد تلقاها بـ 2000 أو 3000 مهيب شيء نجيبها كود تنسى سالفة الحج
يوم إني دقيت عليهم قالوا بـ 30 ألف ، قلت وجع والله لو إن في وسطها ثلاث سويسريين كل واحدن متزهل بعقرب يالربع ماتسنها غاليه ، قال يا ابوي أساسا نفذت الكمية مالك إلا تحجز ونجيبها لك عقب شهر ان شاء الله
والله طرا لي عقب حس هالأجودي إني أفتح محل ساعات لكن ماش لقيت إن الدراهم إلي معي يالله تكفى سير ساعة ويخب بعد
يقول أحد المفكرين الغرب إن ( الفكرة المبدعة دائما وراها خسيس )
هاك اليوم ممددن رجيلاتي في الدكة بالاستراحة وأتفنجل أنا وهاللحية الغانمة ومغير نصب كل واحدن منهم يسولف عن ماضيه ونشاطه يوم إنه شباب تقل كاشتن مع WWF مهوب مع شياب أصغر واحدن منهم عمره 4 برا
يوم درينا ويجينا هاك الخسيس من أخوياة سبحان الله منيب أهضمه ، لاشفته يجيني زكام يالربع أشتهي جح في المربعانية وإلا ودي أبلع لقم طين مربصة في موية زمزم ( وحام مطوع )
ويقعد يسولف ويتسذب قاله ورا منتب تجي تقهوى معنا الصبح مثل منول وش إلي رادك ، قال والله ما عاد عندي وقت ( اخس يا بل قيتس ) لاهي في هالتجاره ، ياعنك إلي ماعنده أسهم ماعنده رزق
إييييييه وأنا إلي أستقعد وأبلع العبسة من زود التركيز ، قلت وش الأسهم ؟
قال أبد تروح للصالة الصبح وتقول أبي في الشركة الفلانية ،، وإلا من جا الظهر تبيعها بربحن طيب إن تسانك حاط مية تبي تاخذ ميه وعشرة .. ومغير تفنجل في هالصالة وتسولف وتحرا بس متى يذن الظهر علشان تبيع
وأنا إلي أفز ،، قالوا وين ،، قلت والله ماعندي وقت وش زودي عن هالخسيس
وأدق على واحدن من الربع خابره يشتغل في بنك ،، قلت له أبو فلان إلك وإلا للذيب ، قال يخسى الذيب ( مهايطي ) قلت أبي أسهم ،، وأبيك قبل تعلمني وش سالفة الأسهم ووشلون أصير راعي أسهم ويبي لها رخصه من البلديه ( لو تبي تدخل الحمام الله يكرمكم لازم رخصة )
قال شف وأنا أخوك إن تسانك على خبري أيام الثانوي فأنت دلخ ماتصلح لك الأسهم وأخبرك تمحق البركة وترى الناس يا أبو ضيم باعت بيوتها وسياراتها مير فك المسلمين من شرك ولا تسبب كارثه على الدولة كلها قلت أها بس ، لايكثر تبي تعلمني وإلا أشوف غيرك قال شف فيه منتدى اسمه .... مامثله ادخل وتبي تعرف كل شيء وأنا أخوك ..
وأنا إلي أدخل وألقى الشباب ماقصروا شارحين لك كل شيء كوب عروة والنجمات اليابانية ماعاد بقي إلا يشرون لك . يوم إني فهمت الطبخه وأنا إلي مسنتر من باتسر في الصالة وأتعرف على إلي فيها وإلاهم ذيابه ،، مغير يقولون لي الشركة الفلانيه وأروح لهاك الموضف حق التنفيذ ساكبن الشماغ سكبة تقل بيرقم الأسهم ،، يالربع أنا ودي أدري هو يدبس الشماغ وإلا يلزقها بشطرطون ، من الصبح إلى العصر وشخصيته وحده ماتتحرك ، هاك اليوم تراهنت أنا وابو مناحي ( هذا مساهم بايعن له 10 غنيمات وحاطها في الأسهم ) تراهنا على 2 باض وواحد حليب شاهي ( بكسر الحاء المرققة ) إن تسان تحركت شماغة 1 سم من يوم ماتفتح الصالة إلين تسكر ،، والله وأكسب الرهان ونفلها من باتسر على هالبيض الله لا يغير نعمته ، من زود الخياس تلطمت الشركات واحمر المؤشر إلا شركة بيشة قفلت نسبه ( متعودين على الخياس ماعندهم شغل )

عينا خير من هالأسهم ،، بدينا بـ 100 ألف ووصلت لـ 300 ألف في ثلاث شهور هذي التجاره مهوب الطماط والفول الله يخلف ويقلع نجيب ..
هاك اليوم جاني أبو شماغ قال يا أبو الليد أنت رجالن تجي فيذا وترج العالم وهذرك واجد وتلهي العالم عن المضاربه وفرعنا بدت تقل أرباحه من التنفيذ ياخيي ،، وش رايك تصير تشتغل في بيتكم عن طريق النت ومالك إلا من يضبط لك كل شيء ويعلمك عليها ،، قلت تم ..
وأنا إلي أشري هاك اللاب توب إلي ماودك إلا تمقل فيه مهاميزه واجد وشاشته يالله تدل فيها بالقارمن من كبرها واضبط الملحق واركب السبلت وأجي للوالده ،، قلت يابعدي من عقب الفجر إلى عصير أنا في الملحق أتاجر لاحدن يحاتسيني ولا يشغلني وإن شاء الله يالغاليه إني لأدلعك لو تبين شد وتكبير وصنفره بهاك العده من عيوني ،، قالت أها بس ، ،، لكن أنا خابره وش تبي تسوي ،، تبي تلعب بالأسهم ( تحسبها أمي بوكر الله يجزاها خير ) لكن حط رب العالمين بين عيونك تراك ممحوق بركه ولو ماكلت حرام تو ماتكمل يا ضناي
إيييه قعدت أهوجس قلت دام إني هالحين في بيتي يعني ما احدن يعرف كم عندي ( خايفن من العين) والأسهم مهيب شيء مايبي لها مطوع ،، والمنتدى فيه توصيات طيبه ،، ورا ما آخذ دراهم أميمتي وأخياتي الله لايخليني ( ننميها ) لهم وأنا إلي أنصى الصالة وإلاهم مجتمعين ،، قلت أفراد عائلتنا المحترمه جاكم الرزق مير تقضبوا ،، قالوا وش هنا ،، قلت والله الذي لا إله إلا هو إني قبل ثلاث شهور ماعندي إلا 100 ألف وهالحين صارت 300 ألف بالحلال ياربي لك الحمد ،، ورا ماتعطوني دراهمكم أشري لكم بها في الأسهم كود ربي يرزقكم ونتعاقب على الوالده إلي يحج بها وإلي يوديها للسوق يكساها ذهب وإلي تبي تبر بها تروح بها لجزر الواق واق ونخلي هالغالية تنبسط يالبى قليبها بس
تحمست أمى ولحقتني عليبه مليانه قشام ( ذهب ) و أخواتي كلهن الله لايخليني بس تصدقون سبحان الله العظيم ما ادري وش جاني حسيت بحنان زايد هاك الحزه من زود الحنان ودي أجمع أميمتي وأخياتي في خيشه وأضمهن ( ضبان ذولي مهمب أوادم )
الضعيفات جمعوا إلي وراهم ودونهم ووصل راس المال 8000 يوم أصبحت أول يوم تداول منزلي وانا إلي أطق في القصيم الزراعية الله يقلع من وصاني عليها واللهم عافنا ويحمر السوق تقل مرشوشن بدم
ويبتل على هالحال اسبوع ،، وأخياتي لمن سألني بشر ،، قلت لالا الأمور زينه والله يعينكم على عد الدراهم بس كل وحده تمر الجريسي وتشري لها مكينة أبانا ويالله تضبط دراهمها
خخخخخخخخخخخ هاك اليوم أمي تقول ،، وليدي ،، أم ناصر جارتنا تقول اشروا في موبايلي تراها تبي تدبل قلت في نفسي والله يا أميمتي لو نشري الكاف بكبره ( رئيس موبايلي ) ما عوضنا الخساير مير عسى الله يعدي على خير ..
تصدقون يالربع إن أشوف اخياتي وأميمتي مجتمعين ويضحكون ويكركرون وأنا أقول مساكين ودي أشوفكم عقب كم يوم لا علمتكم ،، أخف وحدة شلل رباعي الله يخلف ،، ليتني مار شاري في الدوائية كود يصرفون أرباحهم كراسي متحركة تضفكم يابعد قليبي
إيه قعدنا شهرين على هالحال ماطاعت الأسهم ترجع وراس المال صار 18 الف بدال ماهو 400 ،، الله يخلف
وأنا إلي أجمعهم هاك اليوم وأذكرهم بالإبتلاء ،، وإن النبي عليه الصلاة والسلام ابتلاه رب العالمين في عياله ولا خالف ولا جزع ،، ماقال إلا ( إن القلب ليحزن وإن العين لتدمع ) والضنى أغلى منه الدراهم واحمدوا ربكم هذولا عيالكم تسنهم فيران مغير تخاطفون من زود القشر تقل أرضه ماكلين حلوق البيبان ..
وأصرف لهم شيكات كل وحده راح عليها 20% من دراهمها ... وش أسوي وزعت راس مالي عليهم ،، لإني في كل الأحوال أبصرفه عليهم يا هالحين ومهم متعافين وإلا لو عطيتهم نصف الدراهم وجاهم الشلل أبقعد أبزاهم في هالمستشفيات وأدور بهم واعالجهم وأميمتي يبي لها خدامه ترعاها وانا ودى اعرس ونبي نسرمك البيت بدال الفرشة علشان ماتغرز كراعينهم
و رضوا الحمد لله عقب خطبتي العصماء

الوكاد يالربع ما كتب الله لنا تجاره ،، وهذري واجد ،، وأخاف أزود شوي ،
وتحملونا وإلا أقولكم من قدكم لاقين واحدن يتحسي عليكم ببلاش
تدرون ابن شرهان مهوب يجي في هالقنوات ويترزز إلا بهاك العدة فاحمدوا ربكم ..
..
لاهنتم ..

ههههههههههههههه الله يرزقك ويوفقك يافارس الكلمه وين ماتروح ويعطيك العافية على القصة الجميله

قل آآآآآميــــــــــــن أخوي فارس الكلمة ..





الله يوسع صدرك مثل ما وسعت صدري بهالقصة .. والله فطست من الضحك وخصوصا سالفته مع امه وخواته مع إن والله مالي حيل على الضحك ..


بس الله يستر لا أصير ممحوقة بركة من كثر ما ضحكت عليه ..





تسلم يمينك وألف شكر لك ..

المشاركة الأصلية كتبت بواسطة ابو العز

ههههههههههههههه الله يرزقك ويوفقك يافارس الكلمه وين ماتروح ويعطيك العافية على القصة الجميله

واياك اخوى ابو العز سعدت بمرورك

المشاركة الأصلية كتبت بواسطة نزف المشاعر

قل آآآآآميــــــــــــن أخوي فارس الكلمة ..





الله يوسع صدرك مثل ما وسعت صدري بهالقصة .. والله فطست من الضحك وخصوصا سالفته مع امه وخواته مع إن والله مالي حيل على الضحك ..


بس الله يستر لا أصير ممحوقة بركة من كثر ما ضحكت عليه ..





تسلم يمينك وألف شكر لك ..

امـــــــــــــــــــــين واياك اختى الف شكر على المرور

هههههههههههههههه

الله يرج ابليسك اخوي فارس الكمه نقل مميز ولاهنت

الف شكر اخوى ابن مصاول الميزاني اسعدنى تواجدك

هههههههههه الله يرج أبليسك عـــوأأفي خيووو

ههههههههههههههههه
اضحك الله سنك اخوي
لاهنت