(الالــــــــــفيــــــــــه)

عندي فرايد من هجوسي مضامين=عديتها من راس طيب وحميه
شغل هجوسك والتفت يمنا زيـــن=واسمع حروفن واضحه وابجديه
الالف أفهم مقصدي يااحمر العين=الجود ورث جدود ماهو عطيه
والباء برقن لابرق يسهرالعين=برقه يلوح ومن جنوب برديه
والتاء تتبع ضافيات الســـــبالـين=ذودن صفر ماخالطته الرديه
والثاء ثابت لو تروغ المساكيـــن=عن حزة الميقاف والصامليــــه
والجيم جيبن لازهمته على الحين=تبغى جنوب النير والا طميــــه
والحاء حرن لاشهر بالجناحـــين=شال الحباري بالعزوم القويـــه
والخاء خلك للرجال السلاطيـــن=مدهال عز ومدتك حاتـــميــــه
والدال دربك بين وقت الصلاتين=لاشتاق بالك للفياض الـــعذيـــه
والذال ذرب يمين زبن الدخيليــن=لامن تلاشت بين هذي وذيــــه
والراء ربعي ملحقين المخليـــــن=يوم السنين الاوليه ولـــــيـــه
والزاء زيد الطيب خاو الكريمين=مطنطخين الراس والنار حيــــه
والسين سوق الزين لوتكسب الشين=واللي تمده شرط بيجيك زيـــــه
والشين شد الباس لاجل العزيزين=لامن تذكر كل واحد خويــــــه
والصاد صيد المجد خوض الميادين=واعرف طريقك والنوايا مطيه
والضاد ضيفك والمواجيب ثنتيـن=مد الشحم للضيف والشاذلـــــيه
والطاء طير الحر لولا الجناحـين=يمديه مات وللمجاعه ضحيـــه
والعين عون النفس في صالح الدين=حاول تجي حسنه ولاتجيك سيه
والغين غير الحر نسل الميامــين=لاتعتزي بالاش والا حـــليــــه
والفاء فارق ياحريب المعاديـــن=أهل الحسد والبغض واهل الاذيه
والقاف قومن لامذاهب ولا دين=مثل الندا في كوم طيه وطيـــــــه
والكاف كلمه حطها بين قوسين=محدن نشا معصوم ذنب وخطيه
والام لولا ضربت الصاع صاعين=صالت عليك أوجاع نارن صليه
والميم مهما تعمل سنين وسنين=دنيا على ماقيل لحضه دنـــــــيه
والنون نارن ولعت بين ضلعين=فاقصى حشاش القلب شبت لظيه
والهاء هيل وبن ومصوقل الصين=لاصار عندك للطويلات نـــــيه
والواو واحد وارقبه حول عامين=عندي مقامه شرط أصل ومزيه
والياء يالله خالق الناس من طين=لاتبتلينا دون ناســـــــن بلــــيه
هذي نصيحه لاغدى الشور شورين=واضرب سلامي والتحيه تحيه

(فــــــــيــــصل المــــــيزاني)

ماشاء الله تبارك الرحمن
قصيدة جمعت بين قوة الحبكة وحكمة المعنى وجزالة اللفظ ..


صح لساانك حتى ترضى يا فيصل وحياك الله بيننا ...

صح لسانك اخوي فيصل

صراحه الالفيه ممتازه وكلمات روعه .. وبنتظار راي الشعراء فيها

ويعطيك الف عافيه

الله يعطيكـ العافيه شلاحيه مطنوخه واتمنى تكون عجبتك القصيده

وهــــــــذا اللـــــــــــــي أتمنـــــــــاهـ ,,,,,

مشكور مواعيدكـ سراب وأنشاء الله نجيب اللي يسعدكم

ماشاء الله يابو فيحان شاعر وبن شاعر الله يرحم والدك وهذا الشبل من ذاك الاسد
الى الامام يابو فيحان
تقبل تحياتي واعجابي بهذه الشامخه

صح لسانك اخوي فيصل قصيده وافيه وجزله
دمت بخير

الله يسلمكـ يابو حسين وماعليكـ زود وحنا نتعلم منكـ وشهادتكـ تكفي
تـــــــــح ـــــــياتي

صحت أبدانكـ أخوي ساكب الحرف ومشكوووووووووور

ياسلام على هالشامخه يافيصل
ألف صح لسانك وصحيت كلك
قصيده لها اسلوب آخر
تفننت في حبك وسبك ابياتها
لك الود والاعجاب ياصاحبي
.