قصيدة للشاعر / مخلد عتيق الدرين الضباطي

سبحان من نعمته محصي فضايلهـا=من يحصي ارزاق ربي لو يعددهـا
مافيـه كلمـه يضيعهـا ويهملهـا=سيـات عبـده وحسناتـه مجودهـا
اعمالنـا اللـي عملناهـا نقابلـهـا=تعرض على الله بناقصهـا وزايدهـا
مانقـدر الناقصـه منهـا نكملـهـا=الأمـر لله نهـار النـاس ينشدهـا
ينشد جميع الخلايـق عـن فعايلهـا=في ساعةٍ يامناجـي مـن شدايدهـا
يشيب راس الصغير مـن هوايلهـا=والمرضعه ورعها ترميه من يدهـا
وتاضع جميع الحماله كـل حاملهـا=والناس مثل السكارى يوم يجردهـا
مافيـه ملجـا ولاظـل(ن) يـظللها=والشمس تدني على ادنى حد موعدها
ماقـولـه الله ذاكـرهـا وقايلـهـا=كلماتـه اللـي بقراّنـه موكـدهـا
رسالـةً منـه لعـبـاده منزلـهـا=وقوال ربـي بحـر محـدٍ يحددهـا
ياجب على الناس عاقلها وجاهلهـا=السنه اللـي شرعهـا الله تعبدهـا
والحج والصوم مـع باقـي نفايلهـا=زكاة مالك وخمسه الفروض تسجدها
مـع والديـنٍ لهـم نفسـك تـذللها=ابـوك والأم امـانـه لاتعانـدهـا
وسدد هل الديـن لاتجحـد جمايلهـا=في الاّخره مامعك مال(ن) يسددهـا
وكرم ضيوفـك وربعـك لاتزعلهـا=هاذي دروب الرياجيـل وعوايدهـا
وشهادة الزور حـذرى لاتروحلهـا=شهـادةٍ مخطيـه ملعـون شاهدهـا
ومجلس هل اذل نفسـك مايطولهـا=وشوفتك عن شوفة الاْنـذال بعدهـا
وهـل الخطـا ونميمـه لاتعاملهـا=وصفحات دفترك الأبيض لاتسودهـا
وعـداد ماهلـت النـدرى مخايلهـا=الشكر لله بغيـر الحسـاب ارددهـا

وسلامتكم

صح لسان الشاعر مخلد عتيق الدرين الضباطي وقصيدة جزلة أخوي منصور ولا هنت على نقلها لنا

صح لسان الشاعر مخلد قصيده مليئه بالجزاله اشكرك اخوي منصور على ايرادها لنا
دمت بخير

يعطيك العافيه ع الايرااااد
تحياتي لك

صح لسان الشاعر مخلد عتيق الدرين الضباطي
والله يعطيك الف عافيه على النقل أخوي منصور الدرين

قصيدة وعظية دينية جميلة جداً
صح لسان شاعرها ..
وسلمت و لا هنت يا منصور على نقلها ..

صح لسان الشاعر

ويعطيك الف عافيه على منقولك

صحت أبدانكم جميع

شرفتو بتواجدكم

كل الشكر