" الشعب في غلاف الكتاب "

ندري انك بخير ان كان حنا بخير=دام معدنك صافي واطهر من السحاب
مانت راضي يصيب الشعب كبر الشعير=والشكوك ابعد من الشمس وقت الغياب
يا حبيب البلد والشعب والمستجير=يا زعيم العروبة يا مهين الصعاب
كل قولٍ تقوله فالمحافل يصير=كلمة الحق منك السيف قص الرقاب
في زمانٍ يشوف الخافيات الضرير=والرجولة عمت والحر تحت الغراب
والثعالب تلف اذيالها فوق طير=والذيابة سرت وتهاب نبح الكلاب
جاتك علوم عنا من وكيل ووزير=صورة الشعب حلوة في غلاف الكتاب
لكن الشعب فيه وفيه والوضع غير=لو تجيك العلوم مبروزة فالخطاب
زينوا لك صورنا مستشار وخبير=في رحاب الوزارة مجلس الزور خاب
خاربين الطبايع بايعين الضمير=خاينين الامانة آمنين العقاب
بين ( تمسك وانا اقطع ) فيه تاجر خشير=يرفع السعر مستامن بحضرة جناب
يسهرون الليالي كالرحى المستدير=واصبح الشعب منهم بين ضرسٍ وناب
والحقيقة صورنا نار حول الغدير=بين حرق وغرق جسر السلامة سراب
لو شكى الفقر عرعر جاوبت له عسير=والحسا قبل جدة تشتكيه استجاب
كلنا بين مديون الغلا والفقير=نطلب حقوقنا لو صار معها عتاب
مارضينا المذلة من كبير وصغير=عزة النفس سدّت للعطا كل باب
والله انا مرضنا فالزمان العسير=مارضينا عليك خلاف وقت المصاب
ما نمنّه ولكن جابه امرٍ خطير=في وطنا انحرمنا وْغيرنا بلا حساب
والوطن لو علينا قلّ حقه كبير=لو على نهضته ناطى على راس داب
دون أرضه نجي فاليسر قبل النذير=عند رهن الاشارة بين شيب وشباب
والخطر لو يجي لا قدر الله نصير=كل روحٍ على حدّ الوطن ما تهاب
المنايا لها مابين ورد وصدير=والوصية على دين الكفن والثياب

صح لساانك اخوي عبدالعزيز ويعطيك العافية

صح لسانك أخي عبدالعزيز وقصيدة وطنية واضحة المعاني وتصب في مصلحة الشعب و نسأل الله أن يزيل كل الفاسدين الذين أمتصوا قوت الشعب.

نحن نحتاج لمثل هذه القصائد الراقية في طرحها لعلها تصلالى مسامع أهل القرار

-
صح السانك اخي عبد العزيز ...
يعطيك العااافيه....

صح لسانك اخوي عبدالعزيز الشاطري

صح السانك عبدالعزيز الشاطري

قصيده في مصلحه المواطن
وتحكي عن واقع مشهود
والله يزيل الفاسدين

يعطيك العافيه

صح لسانك عبدالعزيز قصيده وطنيه تعد من المعلقات في مدح الوطن وقائد الوطن