قصـــيدة مـــحمد بن نـــــيف التي صدمت الجمهور بشاعر العرب

السلام عليكم ورحمة الله وبركاته



اسعد الله اوقاتكم بكل خير


انقل لكم قصيدة الشاعر محمد بن نيف الاخيره التي انسحب بعد إلقائها على الجمهور


واللجنه ..


قصيده انتظرها الجميع بلهفه وكانت شبه القنبله تطرق الشاعر بها عن اللجنه والبرنامج


وفي الابيات من 49 إلى نهاية القصيده قدم الشاعر اعتذار بسم قبيلة مطير إلى


قبلية عتيبه الهيلا ...


كان للشاعر حضور جميل وجمهور اروع تفاعل معه مع قصيدته وبعد اعلان انسحابه


اعتبروا اعضاء لجنة التحكيم ان انسحابه خساره للبرنامج مع العلم ان الشاعر كان


احد المرشحين بالفوز لكن شموخ الشاعر وعزة نفسه لم تطاوعه على الاكمال


بهذا البرنامج

واعلان الشاعر انسحابه لظروفه الخاصه

الكلام كثير ولن نوفيك حقك يابن نيف جملتنا وشرفتنا انت وباقي شعار مطير


الذين تمنى ابن نيف التوفيق لهم بالمسابقه..



ااتركم مع الابدااااع والقصيده.

1. الله الله يا فنون القوافي من جديد = إنحتي للسابق الباهرة تمثالها
2. انحتي صلد الصخر واشذبي صلب الحديد = ودي اتقـن زخرفتها على تفصالها
3. حي من تطوي سباريت بيدٍ عقب بيد = سابق ٍ يشبه هذيل الذياب إهذالها
4. قدرها يرقا العلا .. لا ضديد ولا ضهيد = جيت اماري به من النايفات إطوالها
5. يا فنوني لو عثر نظمكن عَـقـدٍ مكيد = خلــّـن العقده عليه وأنا حلالها
6. كنت مالي بالقصايد وترديد النشيد = منتصِف عمري وانا كاتم ٍ موالها
7. لين غنـّى الشعر وازجى لحونه لبو زيد = قلت هالحين انتشى الكيف ما يبغالها
8. جيت ألبّي مطلب اللي تعزوا بي عضيد = والله إنه لو بغا إحدى عيوني نالها
9. كايدٍ لو يكبر الكيد ضده ما يكيد = يفتل حبال المكيده على فتالها
10. حي أبو جاسر عماد القبيله والعميد = لا استعزت حاجة الرجل هو رجالها
11. ليه ما امشي له واطيعه واجي فيما يريد = شيخ قوم ٍ طاعته من صلاح إرجالها
12. يا مساء عطر القوافي ونفحات القصيد = من بساتين المعاني وروض اجزالها
13. للرجال اللي اليا سمعت النظم الفريد = ارخت الاسماع للطيّبة وأمثالها
14. هيضة الخاطر عريضة وأنا حبلي مديد = والليالي ما تعلم بغيب احوالها
15. ياعدن ما أنتي عدن عقب مذهبك الجديد = اختلف دينك وْلون البشر واشكالها
16. انتويت اصوم بكره ولو هو يوم عيد = لي هلال ٍ ما يوافق عدن واهلالها
17. كيف اقيم اليوم وانا أمس في بادي شديد = صعب انوّخها عقب ما نتلت اعقالها
18. خلها تمش الهوينا عقب ذاك الفديد = لين تجبرها لحوني على زرفالها
19. حرة تمش عزيزة على ما هي تريد = تنحر افجوج الخرايم وهي وفالها
20. ما بقالي شف غادي ولا شفٍ طريد = ابتلشت بدق الاسباب دون اجلالها
21. مدري النفس استكـفت عن الحلم البعيد = أو تحقق مبتغاها وكل آمالها
22. تهت مدري عفت ، مدري طلع شفي زهيد = حالة ٍ بالضبط ما عَـرْف أوصّـف حالها
23. لكن الدعوى وهذا هو العلم الاكيد = استوى في عيوني اقفياها واقبالها
24. احسب إن النفس تركن على عزم ٍعنيد = واثرها ما هي عنيده ولا الله قالها
25. اتركوني ما تعودت للعيش الرغيد = نابتٍ عضمي على العسرة وغربالها
26. بيني وبين الزمان اشهب الوجه الشديد = به صلة قربى لزوم التزم باوصالها
27. جدي إبن الوقت الاشهب وأنا لإبنه حفيد = وإبن عم ٍ للمشقه وأخو لأنكالها
28. افسحـوا دربي .. عزيز المكانه مايهيد = لين يبعد عزته عن محط إذلالها
29. دام سوّى الكيف حيّ ٍ لفنه ما يجيـد = ما نبي دار ٍ غشا الماء حلوق ادلالها
30. يمكن إن حنيف مضرم ووده يستزيد = مير رد بحجةٍ راهي ٍ مكيالها
31. خل إبن عبد الكريم وعذاره ما تفيد = دلته هاكا السنه ما حكر فنجالها
32. مير عـيـبي طيبتي عن نحاها ما تحيد = لا اقبلت ما عاد تخلف طريق اقبالها
33. كل ما عابوا رفيقي حميته بالجحيد = نيتي عميا وصعب ايـتـبـدل حالها
34. قبل ماتطعن غدر فالظهر طعـن ٍمعيد = ما تميز صالح الناس من بطالها
35. والبلا إني ما أجزي السية إلا بالوعيد = لين صارت ذي سواتي وذا منوالها
36. والله إني لا مراوي ولا عظمي رعيد = مير أحب اللي جزاها بعشر امثالها
37. طال بي ليلي وأنا أجدا دفا ضو ٍ وقيد = اتحرّى حِـل شملا بعد ترحالها
38. ضاق صدري والشماليه الشلتا تزيد = مثلها مثل الشمالي طويل ٍ بالها
39. دام ماحولي كما هو .. جميدٍ في جميد = ويش خانة ناري ومقعدي فاقبالها
40. صبح باكرتطلع الشمس ويذوب الجليد = وإن تعين وين شملا تحط ارحالها
41. يا خسارة ما تلوب الفهود وما تصيد = تنهبه منها ضباع ٍ تهوم اعيالها
42. والله إنا ما نبي قطعة ارزاق العبيد = لكن الناس ابتلتنا بشر اعمالها
43. لو تركنا نهر دجله لهارون الرشيد = باكر زبيده تجينا تسوق اجمالها
44. يوم حملنا الجدايد ونزلنا الهميد = نخـّت إجمال الحمولة بربع أحمالها
45. الجمال تشيل حمل العرب عند الشديد = مير نخـّت مجبرة والبلا جمّالها
46. البضاعه لو تساوي ذهب عبد الحميد = نوب يرخص سومها والسبب دلالها
47. ذي قصيده والقصيد الذي مافيه فيد = طبلةٍ غير الدوخ ما فعل طبالها
48. واجبي يوم المعاني تميـّـل للمحيد = اعدل الميله وابين خطا ميالها
49. جعل يوم ٍ يزعـل اهل الكرامة ما يعيد = من يقول إنا سفهنا عذر زعالها
50. المعـزة قالها الشيخ في حلفٍ وكيد = واشهد إنه يحتمي كلمته لا قالها
51. يا ارزان القوم لا مرّكم ساعي بريد = لا تردون المراسيل مع مرسالها
52. الرسالة كان ما وسطها علم ٍ مفيد = من تحتكم سلة المهملات أولى لها
53. والمعاني عن مسار المعزة ما تميد = مال من تغريه عوج الدروب ومالها
54. ذا وأنا أجزم ما لا أحد يوم طرّا الاسم ميد = وْ لا لكلمة شيخنا غايةٍ يسعى لها
55. حيث من شخصه وقار الرجوله مستسيد = مشلحه والثوب واعمامته واعقالها
56. وش يزعلكم وحنا رفاقه وإيد بيد = والقلوب انظاف وأعذارنا تبرى لها
57. كان منكم واحدٍ عال ما يحسب وحيد = عندنا العيلة بعد واجدٍ عِـيـّالها
58. قلتها والحق كلمة وراعيها شهيد = تنقبل والا تعوّد على قوالها
59. وش لي بْسلب الكرا من جفن عين الرقيد = خلها تاخذ من النوم ما يحلا لها
60. ما عقدنا قيد حتى نجي وإنحل قيد = شرهة العقدة على من يمس احبالها

الشاعر محمد بن نيف

صح لسانه

شاعر حكيم

وخروجه من المسابقة يعتبر خسارة للمسابقة

اسعدني مروركم اخوي

صح لسانه
مانستغرب على مثله
الجزاله والحكمه

مشكور اخوي
الطود
وتسلم يمينـــك

تقبل مرور اخوك
سيف الشجيــع

صح لسان الشاعر وسلمت لنا اناملك التي نقلت لنا هذه القصيده الجزله بكل ماتحتويه الكلمه


قوه في المعاني .... جزاله في النضم ..... سلسة السر ... قرائتها جداً رائعه

تسلم يمينك يالطود على النقل الجيد والممتع


وخروج الشاعر من المسابقه لهو خساره على كل شي ... (( مسابقه .. قناة .. جمهور ... لجنه ...))



تقبل مروري


أخوك

أحمد بن سعد الهضاع

صراحة قصيدة جزلة بكل ما تعني هذه الكلمة من معنى , وهنا يتوقف الشعر والشعراء لكي يعيدوا حسابتهم امام هذا الشاعر المبدع.

أشكرك اخي الطود على نقل هذه الدرة الى منتدياتنا ونرجوك ان تمدنا بكل قصائد محمد بن نيف ...


أخوك ابوضيف الله

قصيده جيده بمظرها الخارجي

ولكن لي بعض التحفظات عليها

اسعدني مرورك اخوي سيف الشجيع

اسعدني مرورك اخوي احمد