ماهز نسناس الشمال النواوير=وما ناض براق المزون المشيعه
ارحب تراحيب السحاب المزابير=من هاجس صلف القوافي تطيعه
باللي ربى قدره على كل تقدير=في ذمتي ما اقول مدحه ذريعه
طبعه تنصاه الرجال المناعير= طبيعه يازينها من طبيعه
مسند ليا عد الرجال المغاوير=دايم وبو نافع يجي بالطليعه
راع الولع دايم يدير التفاكير=تجيه زافات الطواري جميعه
ياصاحبي تو ابتدت ربطة الطير=وش حرك شجون الحصون المنيعه
سته شهور نقزر الوقت تقزير=ماهي بلحية يوم ولا تبيعه
جهز بعدها للسفر والمشاوير=وربط حزامك للديار المتيعه
خل الوريعه ياطويل الاشابير=وترك على قولك شمال الرفيعه
شفي ديار مدهلوها الصقاقير=ارض خلاء فيها الطبيعه بديعه
من دونها كم لحية ودها مير=مدهل همل سحم السباع المجيعه
ماهي بقبلك مدهل للمداوير=مقناصها طب الكبود الوجيعه
اما على وجه عكاشات وسدير=مقناص خد بين سنه وشيعه
ولا على تونس نسوق المظاهير=هذا هوا قلبي وهذا ربيعه
تصبح على الاجوال درج ومخامير=نزيعه قدمك ودونك نزيعه
في وقتها مال النداوي معاذير=الوقت بارد والثنادي صنيعه
وينومسك فعل الوحوش البواتير=كل ابلج سطوات كفه شنيعه
يرهي على برق الطيار المعاشير=ماشال هم الطامنه والرفيعه
وختامها التقدير والمسك لا غير=ياشاعر مامنه شفنا الهزيعه