ياجاهلن عون وينك رايحين وين=اركد وعن عون اخذ نبذه قليله
حنا ذوي عون من مبطي وهالحين=من يعترض دربنا واعزتيله
حنا زحول العرب حنا السلاطين=لا شبة النار في خشم الفتيله
حنا جبالاً على العليا مرسين=وليا وطانا مواطينا ثقيله
يوم المغازي وساحات الاكاوين=بيرق ذوي عون قدام القبيله
أما مع المدلجي واللا بن جبرين=عوض ومتعب هل الخيل الاصيله
وبن سميليل والمزنان شرين=من طاح في نحورهم ما له عقيله
وشامان بن مذيخ اكعام المعادين=يفن العدالعتلى فوق الكحيله
وحنا مع المجزات النا براهين=ومن يجهل الفعل نعطيه الدليله
ابن سقيان كان ايضد تسعين=وبغداد عنه يعلم من يجيله
فيصل وربعه هل العليا السقايين=على العدا مثل سيلن مع مسيله
وحنا ذوي عون مطلقت النساوين=بالسيف نفرق خليلاً عن خليله
ومن لا خضع لأمرنا ذاق الأمرين=الراس عن منكب امتانه نشيله
يرضون الاخصام لو ماهم براضين=ومن يونس النار يرضا بالمليله
امجادنا لو نخلدها دواوين=ما تنحصر بين يوم وبين ليله
خذ موجز العلم عن عون المسمين=هذا كلامي وانا قدمك كفيله
انا ما قول الكلام ابلا مضامين=ولاني بحصني ويستشهد بذيله
واليوم يالله تديم الامن والدين=والحكم والشرع يالله لا تزيله