يقول من عدا على راس عالي=رجم طويل يدهله كل قرناس
في راس مرجوم عسير المنالي=تلعب به الارياح مع كل نسناس
في مهمة قفر من الناس خالي=يشتاق له من حس بالقلب هوجاس
قعدت في راسه وحيد لحالي=براس الطويل ملابقه تقل حراس
متذكر في مرقبي وش غدالي=وضعقت بالكفين ياس على ياس
اخذت اعد ايامها والليالي=دنيا تقلب ما عرفنا لها قياس
كم فرقت ما بين غالي وغالي=لوشفت منها ربح ترجع للافلاس
يقطعك دنيا ما لها اول وتالي=لو اضحكت للغبن تقرع بالاجراس
المستريح اللي من العقل خالي=ما هو بلجات الهواجيس عطاس
ماهوب مثلي مشكلاته جلالي=ازريت اسجلهن بحبر وقرطاس
حملي ثقيل وشايلة باحتمالي=واصبر على مر الليالي والليالي والاتعاس
وارسي كما ترسي رواس الجبالي=ولا يشتكي ضلع عليه القدم داس
يابجاد شب النار وادن الدلالي=واحمس لنا يابجاد ما يقعد الراس
ودقه بنجر ياظريف العيالي=يجذب لنا ربع على اكوار جلاس
وزله الى منه رقد كل سالي=وخله يفوح وقنن الهيل بقياس
وصبه ومده ياكريم السبالي=يبعد همومي يوم اشمه بالانفاس
فنجال يغدي ما تصور ببالي=وروابع تضرب بها اخماس واسداس
لاخاب ضنك بالرفيق الموالي=مالك مشاريه على نايد الناس
لعل قصر ما يجيله ظلالي=ينهد من عال مبانيه للساس
لاصار ما هو مدهل للرجالي=وملجا لمن هو يشكي الضيم والباس