للأم حق وعليها حْقوق يا مسلمين=ما بين سيّات لا جازيتها وحسنه
لكنّ ودي انادي امي بْكلمتين=واطلب من الله يرقّق قلبها واحضنه
يا أمي الغالية وش فيك ما ترحمين=عيالك امراضهم من قسوتك مزمنه
اليا طلع فجرهم يرجون صدرك حنين=واليا غْربت شمسهم درّت هموم السنه
يجنون ما يحصدونه في سبيلك ثمين=وْيرجع عليهم غبينة ما يرد ثمنه
آمالهم فيك مخنوقة بعرقٍ متين=والياس يربط عقارب ضحكة الازمنه
لو انّ ودّه يمدّ الوقت له مرتين=وْفي كل ساعة تمرّه يرجع ويخبنه
ما بين لفح السموم وبين عجّ السنين=ياكم ربيعٍ سمعنا عنه ما نمكنه
يا أمنا الله عطاك الخير لا تبخلين=عيالك اولى من العربان والعربنه
لو كان جار وصديق الحق للاقربين=اللي يبي قوت واللي ما لقى مسكنه
دام الجزا للعمل من جنسه اللي يبين=يا كثر من يكتمه يا قلّ من يعلنه
ان جاك منهم مبرّة فانتِ تستاهلين=واجبك والحق لك وارقابهم ترهنه
وان جا عقوق اصبري دام القضا ردّ دين=من جور دين وهموم الفقر والمسكنه
يا أمنا الغالية مضمون حقك سمين=لكنّ حنا لنا حقٍ ولا نضمنه
منا الوفا عرق ينبض لك ولو تجحدين=وْمنك العطا حقنا لو جاه من يدفنه
يا مملكتنا لك الارواح درعٍ حصين=وقفة شجاعٍ ليا حان الفدا برهنه
انا سعودي فديت امي بقلبٍ وعين=واغيض منها العدا واخرس بها الالسنه

صح لسانك أخي عبدالعزيز

والمملكه ماهي مقصره وخيرها عام على الكرة الأرضية ولكن هناك من يقصر خيرها عن الأقربون للأسف