ذليت نفسي فيك من عقب صديت =واونست من طول الغياب إنكساري
غامض ولك في الحب عيد وتناهيت =أحيان لك سجات وأحيان ساري
أحيان تمدح دلتي لا تقهويت =وأحيان تترك دلتي فوق ناري
وأنا أحبك يا بعدهم وإذا جيت =قام يتأمل فالوجيه انتصاري
وإذا خذلت العين عقب إنك أقفيت =أهون عليّ من الغياب انتحاري
ما هوب حقي منك دامك تخليت =ما هوب ذا عمري ولانجد داري
خيبت ظني فيك يا ليت يا ليت =ماشفت من بعض الدروس اختباري
ما قول ضاع الحلم واددت تشتيت =أقول غاب الصدق لو ما انت شاري
علقتني في بيت واهملت لي بيت =قلي متى بانسى وارد اعتباري
تدري وش اللي يجمع الحي بالميت =ما يجمع أحلام اللقا بانتظاري