صاح الزمان وذقت مر المذاويق=غدر الزمن يا ناس ماله ضماني
عشت الزمان عتاب في لحظة الضيق=وش السبب في ضيقتي يا زماني
اسرح مع الضيقه والأحزان وافيق=واشكي من الأيام ضيق المكاني
الناس تفطر والمتيم على الريق=والناس تفرح والمعذب يعاني
له دمعة بالعين وجرح المعاليق=يا وقت يا وقت العنا وش رماني
اطالع الفرحه بعيون المخاليق=وابكي بدمع الحزن واضحك تهاني
جنبت درب الحب وهمس العشاشيق=ولقيت حرف الياس بخط الأماني
اللي بحياتي ما عطاني مواثيق=لاجت وفاتي وش نفع لا بكاني
موت المعزة ولا حياة المغاليق=ماتت قلوب الناس وضاع الحناني
يا أبوي من بعدك لحقني ملاحيق=من وقت غير فرحتي شي ثاني
صار الفرح بالقلب نار وتحاريق=وأنثر دموع يتيم والوقت جاني
يا ربنا الرحمن تفرج لي الضيق=وترحم أبو برحمتك وتحماني
حصري لمنتديات الموازين الرسمية