بسم الله الرحمن الرحيم
السلام عليكم ورحمة الله وبركاته
إليكم هذه القصيدة التي تعبر عن نفسها
بدون آي مقدمات لأنها ماتحتاج آي مقدمه أبداً
إلي متى يأهل مزاج الوسوسه والمهزله=إلي متى صيعه وضيعه وإنحطاط وهستره
إلي متى مسكه وفكه وإنقطاع وبهذله=نهاركم هم وتعب والليل كذب وسمهره
تبنون صرح(ن)كل سيسانه حلوم ومخيله=وأكبر مشاريع السهر ذله وفقر وثرثره
ماتتقون الله كل(ن)منشغل عن آهله=الكل منكم كن وجهه طالع(ن)من مجحره
وليا نوى الطرقه يهزلك الوطى ويزلزله=تقول وش هالداهيه ماكل واحد يقدره
يسري مسارى الذيب ويشيل القوي ويحوّله=أشجع من الضرغام وآسطى من عيال القسوره
وليا إنتهى وقت السفر فكة وراسه نزله=تلقاه طايح له ونين وله عطيط وعرعره
بلية(ن) ماهو بحي ولاجنازه تغسله=لو جاه واحد مايعرفه حمّله للمقبره
خاوي حزين(ن)ضايق(ن)صدره وفكره منبله=ومن ينقلب عن طاعة الله يقلب الله منظره
وآصل السبب وأول بدايات البلاء والمشكله=الشله اللي دهوره أخس وألعن دهوره
آصحابه اللي ورطوه وحطموا مستقبله=آهل البساط الاحمدي جابوا حصيله وإخبره
أول سنة صحبة وفاء واللي ماتقدره إزهله=لك الوفاء وإن كان قصرّنا عليك المعذره
وثاني سنه حاضر بحاضر وإهلله فوق إهلله=شكرك على جيبك ماتلقى لك صديق(ن)تشكره
وثالث سنه على الحديده وآتبع المتسوله=وإن ماعطوك الناس صدقه بيّع إحلي المره
ويأهل العقول اللي تحبون السنع والمرجله=الله عطاء الانسان عقل ومكرمه ومقدره
واللي مكلف بالعمل لازم يحاسب بعمله=ومن لانصره الله مايلقى له صديق(ن)ينصره
الشاعر/عزيز الميموني