تدري وش اللي يشرح الصدر والبال=ويبعد عن الروح الشقيه شقاها
ممشاك في جو خلا مابه أزوال=في ديرة راع الغنم مارعاها
في ديرة ماحولها بث وإرسال=يكفي عن التكييف بارد هواها
شم الهواء مادمت متعافي الحال=وخل الغرف للي حياته قضاها
مابين تلفازن ومابين جوال=واصياح ورعانه وصجة بكاها
ليل ونهار وجلسته بين الاطفال=وأم العيال مسيره لقصراها
هذا وفاله جعل ماهو لنا فال =اللي نهاية رحلته مبتداها
ماهو بمتعود على قطع الأميال=وان شاف ضلمة ليلته ماسراها
وترى طراة العمر بقفاي وأقبال=وعزي لمن جرد الخلي مامشاها
سج القدم لاونه أيام وليال=أنصحك رجلك لاتقصر إخطاها
بينك وبين المدن حط أشهب اللال=أبعد وخل إزعاجها مع غثاها
وابعد عن أهل الحكي والقيل والقال=ترى الخلا طب الكبود ودواها
وممشاك في روض خضر توماسال=يسواء قصور التاجر اللي بناها
اللي قضاعمره ورى جمع الاموال=وبكره يموت وحاجته ماقضاها
ترى العمر محدود والعبد رحال=يموت والدنيا طويل مداها