ياكثرماتطري طواري على البال=
طواريٍ بالقلب قامت تحوفه=
قامت تسابق بين رجلي وخيال=
والقلب مماجاه كثرت صدوفه=
ياسعود ابا اوصيك ياطيب الفال=
اسمع كلام ابوك واحفظ حروفه=
ليانظرت بجدً في كل الاحوال=
دنياك هذي ما عليها حسوفه=
مره تزين لك بالاقفا والاقبال=
وتضحك لك الايام وهي معروفه=
وان كشرت يجيك بالقلب ولوال=
والظيم من سود الليالي تشوفه=
لاتامن الدنيا ولو المدى طال=
والوقت انا اوصيك حسب ضروفه=
اخذ الحذر يا سعود في كل الاحوال=
واصبر على الشدات لوهي كلوفه=
والدين خله عندك أغلا من المال=
أد الصلاه وصوم والبيت طوفه=
واحرص على اللي خوته تشرح البال=
الطيًب اللي يطرب النفس شوفه=
وابعد عن الخايب ولو قال ما قال=
ومجالس الرديان حذرا تحوفه =
وخلك حكيم وصير للحمل شيال=
ورفيقك المحتاج قدر ضروفه=
واصبر على العوجا ولو حملها مال=
وعلى المقفي لا تجيك الحسوفه=
وخلك على ربعك كما الغيث همال=
يضحك حجاجك والنشاما تشوفه=
واستقبل الطرقي بدله و فنجال=
ترا عريب الخال يكرم ضيوفه