عزام انا بوصيك درب المعزّه=دربٍ يوصلك النجوم المعاليق
بكرة ليا ادْركت وعيونك تقزّه=مابين تغريب المبادي وتشريق
مقفولة الابواب ماهو برزّه=بالمرجلة فكّ الدروب المغاليق
درب المراجل للنشامى منزّه=عن كل نقص وعن دروب المطافيق
اليا مشاه الرجل محدٍ يهزه=مثل الجبل بين الرياح الصوافيق
وْمن ضيّعه واخطاه كلٍ يخزّه=وْلابدّ ماينحدّ يوما على الضيق
والرجل فعله للمغانم يرزّه=ماهو على المنظر والاشكال تلفيق
الحر يضمن صيدته وقت فزّه=والشكل مافاد القطا والغرانيق
وْما ينطق الا حقّ لو تستفزّه=واثق ولا يحتاج لا قال تصديق
يحفظ لسانه عن هروجٍ تلزّه=عن الصحيح وكلمة الرجل توثيق
اللي يبى عند المخاليق عزّه=يلقى المذلة كل يوم على الريق
واللي يعزّ النفس في كل حزّه=يلقى المعزّة عند رب المخاليق