الصاحب الي علينا طول غيابه = مانيب ناسيه لو انه تناساني
له مدةٍ منقطع مدري عن اسبابه = مدري زعل منه والاضاع عنواني
وانا مفارق حبيب الروح مارضابه = ماقدر على غيبتك ياسيد خلاني
لياذكرت العيون السود واهدابه = اقول يالله ياربي لا تبلاني
صحيح بالناس يوجد ناس جذابه = وصحيح بالناس رومنسي ووجداني
لكن قلبي ما يرضا غير باحبابه = وليا نصحته على الباقين يعصاني
القلب ماغير خلي يكسب اعجابه = الصاحب الي بوسط القلب وحداني
لولا الحيا كان والله لاتعزوا به = واردد اسمه مع الاقصين والداني
ياليت ربي خلقني اقرب اقرابه = والا خلق داعج العينين ميزاني
الصاحب الي سلب عقلي وعيا به = حبه سرا في معاليقي وشرياني
حبٍ على سنة العشاق نبدا به = ومنـــزّهٍ عن كلام فلان وفلاني
والا غرام الجهاله مامشينا به = الي نهاية هواهم مقصدٍ ثاني