السلام عليكم ورحمة الله وبركاته
صباح الخير
قصيده حصريه لهذا المنتدى الشامخ وهي بخصوص موضوع شاغل الساحه السياسيه والعرب والعالم وهو تعليق المفاوضات بين اسرائيل والعرب ونتيجة التعند الاسرائيلي .
القصيده
في محلك سر .. جهدٍ ما يسر ولا يضر=انقضى عمر التفاوض ما تقدمنا شعره
لا انكسر عظم العزيمة .. مالنا غير الصبر=لين ربي يبعث جنودٍ عطبنا تجبره
اتــّعـظ يا وِلـْد تالي ولـْدِي السابع عشر=لا تفاوض .. لا تحاور .. مال مسعاك ثمره
لا تضيّع وقت .. مخدوع ٍ بذاك المؤتمر=ما درت مدريد عن شرهات صنعاء وانقره
وش كسبنا من جلوس الطاولة طول الدهر=غير أبو طعم الهوان المر وأم المسخره
لا تأمل خير .. ترجي من سماءً صافي مطر=انتظر حتى تهب الريح وتثور غبره
ولا ترجـّى ريح نجدة .. من مفاعل بو شهر=ما وراء ياسر وربعه غير حقدٍ يضمره
انتـفض ثم انتـفض يا طفل .. وأمطر يا حجر=العدو .. غيرك ، هباً منثور ما جاب خبره
ابتكرنا الصفر للعالم وعودنا صفر=ورقم واحد عندنا .. لكن نحطه فأيسره
لا تحسب إن العدو لا لف ما عنده نظر=لا .. يميـّز .. مير عيا يعترف بالمسطره
لا تفاوض يا فتى .. ما دام بك حيل وظفر=أجمع احجارك .. ومن ينصر إلهه ينصره
العدا ديدنهم المعروف تسويف ومكر=عندهم فاللف ووعود المماطل مقدره
خذ من الفرقان عن تاريخهم شتى العبر=لاوعوا موسى نبي الله في ذبح بقره
الشاعر محمد عامر بن نيف