ياصاحبببي

غير متواجد حالياً

مات الحكي وتبعثر الصدق بالزيف=حيل الله اقوى يا الليال الطويله
كلن على راسي وقف في يده سيف=كلن يبي يقتص بايّة وسيله
احدن كتب له فلم حبكة وتاليف=وحكاية ن من الف ليله وليله
وأضاف لحكايَته فصلين تحريف=شوّه بها كل الفصول الجميله
وأسقط من القصة فصول وتعاريف=واركى على غيره حمولن ثقيله
أصل الحكي كله معازيب مع ضيف=والضيف قفى والردا في شليله
قابل معازيبه بطيب ن وتشريف=وهم احتفوابه بالنقا والفضيله
واقفى يتمتم في ردي السواليف=يطعن معازيبه وحاز الرذيله
ماني باقول شلون او ليه او كيف=باقول بس المستمع عزتيله
ولا انت ياللي كنت لي نشوة الكيف=جيتك عليله ورحت منك عليله
بدا النهار أحباب عشق ومواليف=وخيّم ظلام الليل وحدي قتيله
اقبلت تضحك لي وخليتني معيف=وصارت محبتنا شبه مستحيله
صحيح احبك مير كثر التكاليف=زادت وانا مالي على القلب حيله
لا ما رجيتك لو غدا ليلي مخيف=المقفي ان قفّى حشا ما اجيله
ليل الشتا من صدمتي انقلب صيف=والحظ مال وزاد بالقلب ميله
لانته بكامل في جميع التواصيف=حتى تولع لي براس الفتيله
مع انه البارح لفا خاطري طيف=زولك تهيّا في دقايق قليله
ولنّي ماحب اكون في موقف ضعيف=صديت عن طيفك وصرت البخيله
لك مني ارحل وانت خل الملاقيف=يحكون لك عن كل ميله وعيله
وان جيت يمّك لك ذل وتحاسيف=نذرن علي لاقص كل الجديله

منقوول