بسم الله الرحمن الرحيم
هذا اليوم أدرج قصيدة الشاعر بدر التي قالها في اللقاء
قال الشاعر بدر بن ضيف الله بن زراق بن مصاول بن مدلج هذه القصيدة رداً على قصيدة خاله محمد بن سند بن مصاول بن مدلج التي مطلعها:
يا بدر علم لي ربوع(ن) غوالي=علم وبلغ لي كبار الدلاقين
فرد عليه بدر هذه القصيدة التي تعبر عن ما بداخلها
بسم الله المبدا عليه إتكالي=الله ولا غيره له الخلق راجين
اللي بدع سبعٍ وسبعٍ عوالي=في ستة ايامٍ بقدره وتمكين
ومن بعد ذاى جتني حروفٍ جزالي=من شاعرٍ بخص بضرب النياشين
ناشٍ على سلم العرب بأعتدالي=يستاهل البيضا بكل الميادين
ما صك بابه للطرف والموالي=ولا هو من اللي يوفي الدين بالدين
نطاح للواجب من اول وتالي=كم كبش مصلاحٍ يقلط على الزين
نعمٍ (بأبومتعب) اليا جا مجالي=من روس شوخ تحتمي تربة القين
أبوه حمالي الجنب والمتالي=وحشر الجموع اللي على الهوش ضارين
جاب الأمان بوقت صعبٍ ينالي=والحق ما يقطع بليا براهين
وحقه علينا نذكره بالكمالي=هو راعي الشرفا زبون المخَلين
وجده ليا لحق الطلب ما يبالي=سموه بحصان المطاليب ماضين
كم من قطيعٍ صبحه بالمفالي=ولا غدابه والأجانيب ممسين
وهضيب قايلها بزين المثالي=هذا أبو مشعل وساق البراهين
وإن جو عسوسه من مخيل وأحالي=يقود سلفان على البيد عجلين
وان شانت احوال الدهر والحوالي=ريف الضعوف اللي على الوصل شفقين
وكفه غدا دون الرفاقه حيالي=تكتب على التاريخ بصمات تدوين
ومن الشريف اطلق قروم العيالي=مره ومره يالرجال اللبيبين
وابن رشيد اللي على الشعب عالي=حدوه حمران النواظر على البين
في راي من نظرات فكره جزالي=راي لأبو مشعل كعام المعادين
وأيضاً تلوه أهل السبايا السلالي=كابن شرار ونايفٍ وابن جبرين
يا جاهل انشد لا بدالك مجالي=عن شيخ تتبعه الشيوخ العزيزين
وعن رد معجل يوم كرب الحبالي=خليفة الخيل الرسن للمغوين
وبن نحيت اصبح من الفود خالي=يبا السلامه من رماة متاقين
وأنشد طلال وسال هاك السهالي=عن العبادل والجموع المخيفين
أمنهم من الخوف والخوف زالي=وردوا عقب ماهم على الموت مرهين
وردوا على عدٍ قراحٍ زلالي=حامٍ جوانبها على العسر واللين
شيخٍ شجاع في السنين الخوالي=فتال نقاضٍ وربعه عطيبين
هو عارفة عونٍ بهاك الليالي=والعرف وهبه ما أرثوه القديمين
وهو الأمير اللي يروم المعالي=مفراص ماصٍ صانعينه ذريفين
وطيبه نفاخر به جنوب وشمالي=وتعتز بأفعاله جميع الموازين
هذي حقيقة فعل ماهي خيالي=ولا ينكر المعروف ناسٍ شريفين
ولا يجحد اهل الفضل كود السفالي=ولا يناطح الأخصام كود الخصيمين
ومن ساس فضله مخرن له عيالي=من راس ابومشعل رجالٍ نقيين
وما دام ابو متعب وفا بالمقالي=ما يحتمل شرحٍ يجي فيه تبيين
يقول: انا مجبور عقب أحتمالي=ولا ينقوي صبرٍ تعدى القوانين
من يوم صار اقرب قريبٍ موالي=عدو للأدنى صديقٍ للأقصين
وميل على أهل العلوم الهزالي=واهل النمامه بالنقيلي مضرين
كم فرقوا ما بين غالي وغالي=بالحكي ولا بالمناطح ذليلين
وتهزيلهم ما طمن اهل النفالي=ولا زادوا اللي نفلوهم بتمكين
شحاح الأنفس كالجروف الهيالي=ماتت ضمايرهم ولو كان حيين
تظهر لنا بالنصح والأعتدالي=وهم على كل الهناديب ضارين
بالكذب غطوا نايفات الجبالي=حلوين الألسن بالمعاني خبيثين
والرجل لو يلقى قصور وخمالي=يمكن يشيل من الأداني والأقصين
لا شك ما كل الحوادث تشالي=ولا تنرفي يا اهل العقول الموازين
ويا وي ربعٍ ما مشوا بالميالي=تِتبع ولا تَتبع ودايم حشمين
ولا تشيل الزوم في كل حالي=لضد ند وللرفاقه رفيقين
لله تواضعهم وهو ذا الجلالي=ربعٍ على الشيمات والطيب حرصين
نحبهم ولهم نشد الرجالي=ونودهم لوهم من الناس الأقصين
ويا خال هيضت المشاعر قبالي=ولا فانا مالي ومال المشقين
انا لك الله لاعليه ولا لي=ولا همني جمع الجموع المضلين
شريعة الرحمن هي راس مالي=سيفٍ نسله يودع الهام نصفين
واشعارنا ماهي حروفٍ تقالي=مثل الرصاص اللي تبت الشرايين
تمت وصلى الله عزيز الجلالي=على النبي عد الحجيج الملبين
وصح لسان الشاعر بدر بن ضيف الله بن زراق بن مصاول بن مدلج الميزاني
« آخـــر الـــمـــشـــاركــــات »
غير متواجد حالياً
رد: لقاء منتديات الـــــــــــــــــــــــموازين الأول لــــــــــــــــــــعام 1430ه
