المحاورة بتاريخ 21/12/1431هــ
علي حميدان الدجيما
تراي جيتك يالعقيلي في محلك لاتغيب=انته تحدا والرجال اليا تحدت جيتها
خابرك ذيب ولايضدك فالمواقف غير ذيب=حتيش لو كل السنون الجارحه حديتها
عبدالرحمن العقيلي
يامرحبا بالرامي اللي لارمى الصيدة يصيب=لاعاد تنشدني عن علومٍ وانا موحيتها
مال البنادم غير مايكتب له الله والنصيب=مير الفرس هاذيك بعد العصر وش سميتها
علي حميدان الدجيما
ترا الدجيما مايودي من فراغ ولايجيب=لاكنك اخشع في صلات الظهر لاصليتها
ماني مسميها وانا اشوفك مسند لك شعيب=ياليتها ماجاتنا من يمكم ياليتها
عبدالرحمن العقيلي
الظاهر انك شاعرٍ مامر بك وقتٍ عصيب=ولاذقت ويلات الليالي مرها وحلتيتها
وفي وسط ربعك صرت في لمحة بصر مثل الغريب=ولو دريت ان الاوادم صم ماخاويتها
علي حميدان الدجيما
ترا الرغا بعد الهدير الله يبارك فيك عيب=وانت القديمي بعد ماحديتها رديتها
وشلون تذن وانت ماحصلت للمسجد خطيب=عزالله انك في هذيه ذمتك مبريتها
عبدالرحمن العقيلي
تر المنادي لارفع صوته ولاله من مجيب=يبا يسويها كذا مثلي كما سويتها
سندتها على جبل ثم حط له دوني صحيب=وكلن يشير ام الكباير لين هدو بيتها
علي حميدان الدجيما
اما تصلح غلطتك ولايبا راسك يشيب=وتعود الدعوا على راسك بعد ضويتها
تبا توقع فاللحم ولا توقع فالصليب=اليا ضبطنا عقرب الساعه على توقيتها
عبدالرحمن العقيلي
ابشر بعزك ياعلي بكره قبل شمس المغيب=انا ليامني وردت مع الجمال ارويتها
نروى الجمال ونروى العطشان ونحب اللبيب=اقول وافعل واروي سيوفي ليا سليتها
علي حميدان الدجيما
انا ادري انك شاعرآ وافي ومع ذالك اديب=ومع الاسف يابو حمد خميتها وخطيتها
منته مشبب لو قالوا لك مشبب ياشبيب=ولعت نارك في طرف ثوبك ولا طفيتها
عبدالرحمن العقيلي
الا انت مالك في امورٍ مايعالجها الطبيب=والا؟ تمن بسجةٍ من يمنا سجيتها
خلك ورا هاك الديار اللي حياها مايغيب= واسلم وسلم لي على مسكه ليا مريتها
علي حميدان الدجيما
انا احمد الله مالحقني شك في فعلي وريب=وبيبان بيتي في وجيه امطير ماصكيتها
يابو حمد مايصلح الباطل مع الحق المصيب=وانته تبا تكحل عيون الفاتنه وعميتها
عبدالرحمن العقيلي
يهيب ياوجه الردي؟والا انت تكرم عن يهيب=مطير جاتك تشتكي مني ولا شكويتها
مطير منت لسانهم في موقع الجمع الرهيب=وان جات تبغى العز من شرواك ماعزيتها
علي حميدان الدجيما
الضاهر ان الدلوا طاحت بالرشا وسط القليب=وردة حيام وصدرت يالعبدلي مسقيتها
والخلفه اللي ديدها مصرور مافيها حليب=ليتك قبل يرضع ولدها ديدها ذكيتها
عبدالرحمن العقيلي
وش فيك في تالي العرب كنك تدور لك ذهيب=تبغى لك دروبًٍ تغيب الشمس مادليتها
مالك نصيب فالعشا لامن بعيد ولا قريب=مادام دلوك قدم دلوي فالثراء دليتها