" العين للقلب شاشة "

النفس في شوفة المحبوب ملتاعه=والحب عن شوف غيره بات معميني
فيه المشاعر لنا بالسمع والطاعه=والقلب بيّن على عْيوني عناويني
القلب له لو تغلّى .. فيه مرباعه=دايم يصبّحني بْخير ويمسّيني
احيان ماحسّ بجروحه ومقلاعه=اليا التقت بالمشاعر عينه وعيني
واحيان نبضه يطمّنّي على راعه=مرتاح لو السهر للعين مشقيني
والعين للقلب شاشه تكشف اوضاعه=والبثّ فيها مشفّر بين قلبيني
من شان خلّي يشوف الحب واوجاعه=ويشوف يوم يتمشّى فالشراييني
وْيرفق بحالي ويعطيني ولو ساعه=من كلّ ليله يبرّد جمر يكويني
يا عين لو هلّ دمعي صعب مرجاعه=بثي برامجك حصري بينه وبيني
وْياقلب لو صار بين الناس قطّاعه=الوصل ساس العلاقة للمحبّيني

اللعين للقلب شاشه تكشف اوضاعه
واللبث فيها مشفر بين قلبيني

الله الله عليك اخوي عبدالعزيز هنا لنا موعد مع الابداع والتميز قصيده جميله جدا ابدعت في صياغتها باسلوب جميل
ياعين لوهل دمعك صعب مرجاعه
بثي برامجك حصري بينه وبيني
صح لسانك اخوي عبدالعزيز لك تقديري

ما شاء الله , صح لسانك أخوي عبدالعزيز وقصيدة مميزة تضمنت كثيراً من العبارات والمعاني الراقيه بين المحبين ..

أستمتعت بقرأتها ولا فض فوك

صح لسانك ياخوي عبدالعزيز لشاطري وحضور كالمطر
ابيات كلها عذوبه وفعلاً ارويت الذائقه بهذه التحفه
.
.

صح لسانك