|
||||||
|
||||||
|
||||||
|
 |
 |
 « آخـــر الـــمـــشـــاركــــات » |
|
|||||||
| الأدب العام القصص و الروايات وكل ما يخص الأدب دون الأشعار. |
 |
| انشر الموضوع |
|
|
أدوات الموضوع |
 غير متواجد حالياً
|
رقم المشاركة : ( 1 ) | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
كريم سبلا...., والحظ منحوس 2
كُتب : [ 03 - 02 - 10
- 06:40 PM ]
اللي شاف معنا الحلقة الأولى ماعنده مشكله والي ماشافها يطمر الله لا يهينه هالحين يشوفها ويجي بسرعة علشان يكون معنا في الصوره ونبي ننتظره لين يجي (الله اكبر يامعدي الطويلة على بالك مسلسل تركي ماني شايف لا الأولى ولا الثانية ويالله بآي) المشــــــــهـــــــد الأول المهم دخل أبو عزيز على ضيوفه وعلمهم بالسالفة قال واحد منهم يعرف لنفسية أبو عزيزلا تحّرق دمك ولا شيء الليلة عشنا من ثلاجتك وبكره غدانا على خروف ثالث لكن تعال وعطنا علومك الليل بدري وأمر الله من سعه وأبو بطنين يقول في صدره(ياشيخ فكنا من المجاملات بلاك ماعندك قومه الفجر علشان تجمع المعلمات) قامت أم عزيز وطلعت اللي في ثلاجتها من لحم وطبخته مع راس الخروف وحوالي الساعة الواحدة والرياجيل متعشين وخالصين وناموا ويوم صلوا الفجر قام أبو عزيز وزين القهوة وأم عزيز ضبطت هاك القرص المعفوس بالسمن البري وبعد ما تقهوواوافطروا قام رفيق أبو عزيز اللي البارح وحب راسه وحشمه وقال اناطالبك مطلوب إن تسمح لنا قال أبو عزيز أبد ما يصير قال اسمعني أعلمك حنا لنا لزوم عند رجال هنيا وبنروح نخلصه وحنا بعد أيام نبي نجي إذا نبتت الديره وربّعت(ديره أبو عزيز جايها سيل قبل أسبوعين) علشان تمشينا فيها وناكل خروفك قال ابوعزيز وعد قال وعد لاكن أعزمك على زواج ولدي فلان على بنت الرجال هذا يوم الخميس اللي ماهو هذا اللي بعده في القاعة الفلانيه في الرياض ويشرفنا حضورك بابو عزيز قال أبو عزيز الله يتمم لهم بخير وإن شاء الله مايردني عن الحضور غير الشديد القوي ...... المهم يالربع يوم جاء ليله الخميس ليلة الزواج دق ابوعزيز على أبو بطنين وقاله بكره عقب صلاة الفجر خلك جاهز وطلع لنا الجيب (من نوع فكسار آخر مديل للمناسبات الرسمية فقط)نبا نروح للرياض نحضر مناسبة الربع قال ابوبطنبن الموتر أخذه لاكن أنا اسمحلي أنا كل يوم أقوم الفجر وانتظر يوم الخميس علشان أنام وأنت تصبحنا مع الفجر قال أبو عزيز ما عنك مجناب المهم أقنعه أبو عزيز كعادته في كل مره(ابوبطنين إنسان طيب القلب وسيلعب دور البطل في حلقات قادمة) المهم صلى ابوعزيز الفجر في المسجد وطلع يم خويه وسرحواالرياجيل في ظهر المبروك موتر أبو بطنين ووصلوا الرياض وعلى طول راحوا لسوق الحلال في الجنادريه واشترى هاك القعود ووداه يم ربعه وتغدوا وتعشوا معهم وبعد ماخلصوا قال ابوعزيزلربعه متى وعدنا قالوا وعدنا إن شاء الله الخميس الجاي فيه واحد من الجماعة جاي محيل مع بعارينه ونازل ورآكم في المكان الفلاني (يبعد عن ديرة أبو عزيز حوالي 100كم )وعازمنا قال ابوعزيز خلاص مروني ثم روحوا للرجال اللي عازمكم قالوا ماحنا جايينك إلا بشرطين الأول إنك تروح يم رفيقنا هذا نبي ناخذلنا عنده يومين ثلاثة نتمشى مع الربيع ونشرب حليب ونوسع صدورنا قال أبو عزيز والشرط الثاني قالوا أنت وافق على الأول ونعلمك بالثاني قال إن شاء الله إني معكم قالوا والثاني نبغى لنا خروف هرفي لباني وتطلعنا عليه في البر كشته خاصة مغير حنا وأنت وخويك هذا بدون رسميات نبي ناخذ راحتنا ونستانس قال أبو عزيز تم ورجع هو وخويه يم ديرتهم.... المهم يالربع,,,,,,,,,,, يوم جاء نص الأسبوع وأبو عزيز يقوم يتفقد أغراضه ويوصي أم عزيز تشوف الناقص منها ويوم الربوع بعد المغرب وعزيز يدخل الددسن في الحوش ويقوم هو وأبوه وحواته وأمه يحملون الأغراض من أدوات الطبخ وطعام ومويه وغاز وعزبة القهوة والفرشات وخيمة المكشات ويلفها أبو عزيز بالشراع ويربطها بالحبال ويدخل ويجلس مع عياله وكل شوي ينشد أم عزيز حطيتي الحاجة الفلانيه لاتكونين نسيتي الحاجة الفلانيه قالت أم عزيز ياإبن الحلال حطيت كل شي اللي تحتاجه واللي ماتحتاجه حتى عيدان الأسنان حطيتها قال أبو عزيز حنا وسط البر ماحنا في حاجه عيدانك قالت ويش أسوي أبغى الفكه قام أبو عزيز يضحك وقال منول ياأم عزيز ناوي أتزوج الثانية عليك والحين الظاهر إني هونت قالت لاتهون ولا شي وعساك على القوه رح تزوج وترى مهرك علي وأنا أم عزيز مير ماوالله ما تحصل اللي تصبر عليك مثلي قال لها لاتحد يني ثم أجيبها عليك ويش رايكم في كلام امكم يقوله أبو عزيز لعياله(خمس بنات وعزيز والصغير عبد العزيز عمره أربع سنوات )قالت وحده من البنات لايابوي مغير تضحك عليك ماهو من قلبها قال عزيز خلاص مادامها تقول تزوج تزوج عليها وأم عزيز تحذفه بالجوال بغت تطير رقبة الورع وقاموا يضحكون كلهم على أم عزيز (عائله مستقره تسودها المحبة والاحترام والتفاهم مع كون الأب والأم ليسوا متعلمين على عكس واقعنا نحن الذي كثر فيه الطلاق وفشل الكثير منا في تكوين البيت السعيد) وقام أبو عزيز ودق على صديقه أبو بطنين وقال خلك جاهز بعد صلاة الفجر قال أبو بطنين هذي والله النشبه أنت علامك كل ماجاء يوم خميس طلعت لنا مشروع قاله أبو عزيز بكره بسوي لك فطور على الكبده لكن إسمعني أبغاك تجيب معك واحد من عمالك علشان يساعدنا وبدفع له إجرة يومه(أبو بطنين عنده مؤسسة مقاولات وبالطبع وهميه والعمال فاكهم في الشارع كبقية الشعب) والوعد إذا صليت الفجر تجيني في سوق الغنم ,,المهم تعشى أبو عزيز بدري وقام ونام وقال لعزيز نام وأنا أبوك بدري ورآك قومه ويوم جت الساعه حوالي 12قام أبو عزيز من نومه بعد ماشاف ذاك الحلم المزعج وراح يستغفر صحت به أم عزيز وقالت أنت وش فيك قال لها شفت لي حلم الله يكفيني شره قالت له خير إن شاء الله علمني وش هو علشان أدق الصبح على جارتي أم مهند تفسره لي (أم مهند مدمنه تفسير أحلام ولا فيه رقم مفسر أحلام إلا وهو معها) قال أبو عزيز فكيني من علومك أنتي وأم مهند وقام وراح لحوش البيت يتفقد السيارة وكان فيه مطر خفيف (رش) المهم رجع صلى ركعتين تهجد وكمل نومه ومع أذان الفجر وهو صاحي وقوم عزيز وشغل الرجال موتره وقال في نفسه ماني مصلي في مسجد حارتنا مستحي من جيراني إذا شافوا العزبة بيقولون ماعزمنا على المكشات وحنا طلعتنا خاصة وراح ووقف عن هاك المسجد اللي وسط هاك الحارة ودخل وصلى هو وولده ويوم طلعوا وركبوا سيارتهم وليا هاك الرجال اللي ينادي ياولد على هونك على هونك وقف وجاه وقال سلام قال أبو عزيز وعليكم السلام قاله ماعرفتني وقاله لا والله ماعرفتك قاله أنا اللي واجهتك هاك اليوم عند الإشارة يوم معك الخروف (طلع الشايب الأعور وأبو عزيز مصلي في مسجد حارته ) قاله أبو عزيز والحين ويش تبي قاله أنا عندي قطعة غنم وأبغى لها فحل وأبغاك تعلمني بإسم الرجال اللي شريت منه الخروف علشان أدور عنده واحد من إخوانه قال أبو عزيز أنا والله شاريه من السوق ولا اعرف اسم راعيه قاله الشايب طيب إذا جاء للخروف معك عيال احجز لي واحد منهم قاله أبو عزيز والله الخروف ياشايب راح عساك ماتروح مراحه أكلناه قاله عز الله إنها خسارة الموت فيه قاله أبو عزيز ماتوا شمطان اللحى ماهو الخروف لكن حنا مستعجلين تبي شي قال له الشايب الأعور (صار لزقه عنزروت ) شكلك ناوي المكشات في هالربيع والديره الممطوره لكن دام الخروف راح وش رايك تبيعني هالددسن أبى أفتك من الجيب الشاص اللي قطع قلبي بالمطاب قاله أبو عزيز المعارض عندك مليانه من السيارات قال الشايب ياإبن الحلال المعارض مغCير شريطيه نصابين وبيضحكون علي أنا أبغى لي سيارة مع راعيها مثل موترك هذا نظيف (ويقوم الشايب الأعور يضرب بيده على رفرف وكبوت السيارة من جهة اليسار) قاله أبو عزيز موتري ماني بايعه قال الشايب الأعور الورع هذا اللي معك ولدك يقصد عزيز اللي كان في هاللحظه متجمع في فروته من البرد ولا طالع غير خشمه وعيونه قال أبو عزيز إيه هذا ولدي قال الشايب الأعور ياحليله حليلاه قايم يصلي الفجر والله ياخوك إن عندي عيال أعمارهم فوق العشرين ماهم كبر ورعك هذا وكل صبح وأنا أنهمهم لين يتقطع حلقي ولا يقومون يصلون الفجر مع المسلمين قاله أبو عزيز الله يهديهم لكن أنت وش رأيك تفك بابنا اللي أنت متمسك فيه وتخلينا نمشي ,,المهم بعد جهد جهيد حرك أبو عزيز وهو يقول هذا وين صبحنا ماحتى قرينا الأذكار ودق على أبو بطنين ومارد عليه قال شكل الخبل هذا رقد وخلانا مالنا غير نروح له في بيته ونصحيه ,,وفي هالحظه دخل الشايب الأعور بيته وطلع صوته وجات زوجته وقالت ياالله صباح خير أنت علامك مع هالصبح فجرت روسنا بصوتك قالها بلاك ماشفتي اللي شفته ورع كبر اللقمة قايم يرتعد من البرد يصلي الفجر مع أبوه وأنتي عيالك الواحد منهم جنبه كبر الحمار مرتين ولا يقوم يصلي مع المسلمين (إنطلق السهم ياعزيز) (ياإخوان العين حق ولا تشاور صاحبها فأخوكم معدي الطويلة بعد إرادة الله عانى بسبب هذه المشكلة سنوات طويلة ولا يزال حتى هذه اللحظة التي يكتب إليكم فيها يعاني فادعوا له بالشفا مما هو فيه في صدوركم فقط من غير كتابه في المنتدى وإذا شاهدتم مايعجبكم فاذكروا الله حمى الله الجميع) نعتذر لكم عن هذا الانحراف في الموضوع ونترككم مع ,,,,,,,,,,,,,, الــــــمــــشــــــــهــــــد الثـــــــــــــانــــــــــي المهم وصل أبو عزيز لبيت أبو بطنين قال إنزل ياعزيز وأنا أبوك ودق على عمك الباب بسرعة تأخرنا قام عزيز ورمى فروته في السيارة ونزل يركض بسرعة وكان قدامه في الشارع علبة بيبسي داهستها سيارة (وفيه احتمال يكون اللي دهسها أبو بطنين هههههههههههههه ) وصايره على شكل مستطيل مساوية للأرض ومبتلة من المطر وتزلق رجل عزيز في العلبة ويطيح المسكين ذيك الطيحه القوية على ظهره ولكن الله ستر لم يصدم راسه بالإسفلت ساعده في ذلك صغر سنه وخفة وزنه (الرشاقة حلوه )وجاء ابوعزيز يركض ومسك عزيز وقال فيك شي وأنا أبوك تبيني اوديك للمستشفى وإلا أرجعك للبيت قال عزيز لا يابوي والله العظيم مافيني شي مغير شوية دم في رجلي وقام الولد يمغط إدينه ورجليه حتى يثبت لأبوه إنه طيب عشان مايرجعه للبيت وتروح عليه الكشته ,,, في هذه اللحظة طلع أبو بطنين من بيته وشاف الموقف وقال ياالله صباح خير أنتم ويش فيكم علمه أبو عزيز بالسالفة وبعد ماتأكدوا من سلامة عزيز مشى أبو عزيز وولده واتجهوا لسوق الغنم وأبو بطنين شغل موتره من نوع فان اللي ينقل عليه المعلمات (مربيات الأجيال ؛؛؛؛؟؟؟؟) المهم وصل أبو عزيز للسوق واشترى هاك الخروف الهرفي اللي ودك تآكله وهو حي ههههههه وجاهم أبو بطنين بعد مامر العامل حقه وقاله أبو عزيز قرب علينا موترك نبي نحط الخروف فيه قاله أبو بطنين أنت صاحي ولا مجنون تبيه يوسخ علي السيارة قال أبو عزيز لاماعليك الحل عندي وراح وجاب مجموعه من أكياس الشعير الفاضيه ودخل الخروف في واحد منها والباقي سواه على شكل فرشه في مكان جلسة معلمات الأجيال هههههه وقال أبو عزيز لصديقه أنا بآخذ الهندي وبنروح عشان أحجز المكان الزين من بدري تعرف اليوم خميس والناس اللي تطلع للمكشات واجد وأنت وعزيز روحوا ودوا الخروف للمسلخ وانتبهوا لاتقطعونه تقطيع ثلاجة المهم اتجه أبو عزيز للموقع وأبو بطنين وعزيز اتجهوا للمسلخ وقام يسولف له عن قصة الطيحه ويسأله هالحين يا عم ولدك فلان مابغى يطلع معنا للبر قال أبو بطنين قصدك (التفخ) هذا وأنا عمك توه ينام هالحين سهران ليله كله على الانترنت حطيته له ابغاه يتعلم ويستفيد والحصيل الدراسة وأهملها والعيون ما عاد يشوف بها زين إلا أنت يا عزيز ما عندك انترنت قال لاوالله ياعم أبوي رافض ويقول ركز في الدراسة قاله هوصادق واناعمك أهم شيء الدراسة والانترنت ممدي عليه المهم وصلوا للمسلخ ويوم جاهم القصاب قاله أبو بطنين قطع الخروف يا صديق تقطيع تلاجه وعزيز يقوم يصيح لا لا مفطح وابوبطنين يقوم يضحك ما غير ابشوفك يا عزيز انت حافظ كلام أبوك وإلا لا,,, خلاص ياصديق قطعه مفطح علشان عزيز ابو هنود القصاب اليوم لو في راسه ميه جنجان أكيد انه ماهو غلطان مثل المره الأولى لأنه يشوف هالداهيه اللي وراه ههههه جلس ابوبطنين على الكرسي وقام يسولف مع الموجدين عنده عزيز الماخوذ لف الشماغ الملون وعصبه على راسه ورفع الرجال ثوبه وربطه في وسطه ودخل مع خروفه داخل عند مكان الذبح وهو بنشب لابو هنود نشبه وكل شوي وهو يقوله ياصديق لاتنسى تراه مفطح حتى قبل الهندي لا ينزل جلد الخروف وابو بطنين يناديه وابك ياورع تعال الدم لا يوسخ ملابسك قاله لا لا ماعلاك ياعم قال ابوبطنين صدق من قال من شابه اباه فما ظلم ,,,,,,,,,,,,,,,,,,,,,,,,,,,,,,,,,,, ابوعزيزوصل المكان ونزل عند هاك الطلحتين اللي وسط المسيل اللي صاير كأنه فرشه خضراء من العشب والمطر راشه في الليل يعني جو على قولتهم يرد الروح وكالعادة حصل الناس الي جايين في المكان من قبل تاركين فيه بقايا الطعام وأكياس ( أنانيون حتى مع الطبيعة ) وقام واعطاء العامل أكياس زباله وقاله جمعها ودها بعيد ولع فيها بالنار,, نزل ابو عزيزاغراضه وزين الفرشات وشب الرجال ناره وصلح هاك الدله اللي فنجالها يقعّد الراس ووصلوا ابوبطنين وعزيز ونزلوا اللحم واخذ منه ابوعزيز وضبط الفطور وحطلهم نصفه والباقي تركه في القدر علشان ضيوفه إذا وصلوا يفطرون عليه ودقت عليهم أم عزيز تشوف اعلومهم ويوم وصلت الساعة حوالي تسعه دق ابوعزيز على أخوياه وينكم قالوا إن شاء ساعتين بالكثير ونكون عندك لكن عطنا الوصف وقام ابوعزيز وصفلهم المكان (يبعد عن ديره ابو عزيز حوالي25كم إسفلت وحوالي 12كم صحراء ) وبعد ماسكر الجوال قال ابوعزيز أنا أبروح يم المحطة الي على الطريق أبغى أجيب منها خبز بر ابو فلان (يقصد واحد من ضيوفه) معه سكر الله يشفيه ولاياكل الخبز الأبيض ولا الرز واليوم يوم مريت المحطه الصباح قالي العامل الخبز البرمايجي غير الساعة تسعه لكن ياعزيز وانا أبوك انتبه للنار والأغراض ترى عمك اعرفه عقب هالفطور بينام وانا كلها إن شاء الله اقل من نصف ساعة وأكون عندك المهم حرك ابوعزيز على موتره وابو بطنين يتلحف بشته الشتوي ويحط راسه ويقول لعزيز اسمعني وانا عمك أنا بآخذ لي غطه لين أبوك يجي لاكن انتبه للأغراض مثل ما وصاك أبوك المهم وابو عزيز مع الصحراء ومتجه للمحطة والمسجل شغال فيه القصيد الجزل ولا عنده من الشيطان طاري وحاط رجله وبيني وبينكم الرجال كان مزود السرعة شوي (لا تعتقد إن الأخطار لا تأتيك إلا في المدن وعلى الطرقات المعبدة فالقدر قد يلاحقك في أي مكان فكن حذر أين ما كنت ,,, (مع تحيات إدارة المرور وأختها الكبرى الشرطة وولد عمهم الدفاع المدني ) (والجوازات تحاول أن تدخل معهم ولكن يطردونها بكل شراسه ويقولون لها اطلعي عنا يا دلوعة امها ) ويمشي ابوعزيز مع هاك الخط الي يطلع به مع راس جذيبه (ضلع صغير لا كن إذا جيت دونه لا تستطيع أن ترى الي وراه ) ويوم جاء ابو عزيز في راس هذه الجذيبه والسيارة على سرعتها ونزل منها ولانه نازل يا الربع على هاكــــــــــــــــــــــــــــــــــــــــــ (للأسف انتهت الحلقة لان المخــــــــــرج عـــــــــــــــــــــاوزكـــــــــــــــــذا ) ملاحظـــــــــــــــــــــــــــــــــــات 1/اقر واعترف أنا المدعو معدي الطويله بأن الرواية والقصة والخاطرة والكتابة والمسرح والدراما أداب وفنون لها قواعدها وشروطها وعلومها الخاصه بها ورجالها اللذين يمثلونها ومن المؤكد أني لست منهم فأرجوكم لا تظلموا هذه الأشياء الجميلة وتنسبون ماقد اكتبه لأيا" منها ,,,, وإن كان عندي شيء فهي مجرد شطحات فكر عبثيه صدقوني لا اعرف كيف ومن أين ومتى تأتيني,,, 2/ تصدقون يالربع إن كل هالسالفه اللي كتبتها لكم ماكان قبل أسبوع في راسي منها شيء لكن سبحان الله العظيم مدري وشلون وليش جاءت حتى الأشخاص والأسماء الي فيها والله ما اعرفها ولا تعني لي شيء حتى ربعي القريبين مني لا فيهم لا عزيز ولا ابو عزيز لكن ما أقول غير عسى ربي يجعل في الأمر خيره ,,, 3/ الحاقدين على الشايب الأعور يسلم عليكم ويقول قلهم الي صار للورع عزيز مجرد جس نبض وخلهم ينتظرون هدفي العالمي في مرمى ابوعزبز 4/ إن شاء الله وساعدتني الظروف فا انتظروني مع أحداث مثيره للغاية في الحلقة القادمه من مسلسل كريم سبلا والحظ منحوس وفيها تشاهدون التالي ............... الزول عصمان ,,, نفرتيتي ,,, الشرطه ,,, برج المملكه,,, الرقيب ابو نمر,,, الرقم N99/9 ولاكن لا تقولون لي متى لأني توهقت وسلمت العمل للمخرج العالمي ادم مختار الابيضاني ههههههههههههههه 5/ من يريد مشاهدة الحلقه الثالثه قبل عرضها على شاشة منتديات الموازين فعليه مراجعه المستشار المالي للمسلسل العضو القدير الرمح ,, يعني افهموها ما عاد فيه شيء بلاش ههههههههههه 6/ كنت اسمع بعض الممثلين والمخرجين يقولون إذ سلمنا العمل للتلفزيون نسافر ولا نشاهده وكنت استغرب منهم لكن هالحين حسيت في شعورهم والظاهر إذا نزلت الحلقه في المنتدى سوف أنحاش (أقول انت يالي اسمك معدي الطويله أنا الي جيتك في بدايه الحلقه وهالحين جيت علشان اقولك انت على بالك عادل إمام و يالله بااااي ) على طاري عادل إمام مره سمعت شيخ مصري يقول دعونا الله أن يرزقنا إمام عادل فابتلانا وأرسل إلينا عادل إمام فـــــــــي الخــــــــــتام أتمنى أن يكون في ما قدمته ما يستحق أن تشاهدونه
|
|
|
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
