السلام عليكم ورحمة الله وبركاته
مبارك عليكم الشهر وتقبل الله طاعتكم
بعد طول الغياب حبيت اقدم ما يرضي ذائقتكم الشعريه
واتمنى تنال إعجابكم
رميت أطراف جسمي فالبسيطة من تعب وإنهاك=وغبن ٍ مشتعل فالقلب مثل النار مشتبه
بعد كسّرت كوري للطريدة من ثقة وإدراك=حسبت إنه قدر محتوم وآنا للقدر سبّه
رجعت مرصع ٍ خفّي من المقناص بالأشواك=عقب علقّت قلبي في رجاء خشف ٍتلاعبه
لعبّه جيد ريمي ٍ تدرّق في غصون الراك=وأحاسيسه على رزّة طويل العنق منصبه
لمحته والتمع مرتاب واعرض في وجل وارباك=تذيّر عقب هب الريح واستوحش من الهبه
رمى عود الأراك وطاح من هاك اللما المسواك=منه يجن النحل شهدٍ من المبسم تشربه
علامك ياخشيف الريم طوّحت الخطى منّاك=تضرّبني سراب ٍ قام يطرق كنه الغبه
تتبّعتك من اشريق الضحى لين الظلام أمساك=وقلت بخاطري كبّه عقب حل المساء كبّه
يعزّيني فراش الروض لارفرف على وجناك=يرود بوجنتك ورد ٍ حمر وجهك تنقبه
وعزايه في شعاع البدر لامسّا على ممساك=ونور ٍ رد بالترحيب من غرتك واللبه
وعزايه في عبير الروض لا سلم على محياك=وثغر ٍ بعثر الريحان بأنفاسك ورحبه
وعزايه فالنسيم اللي سرى يمي على مسراك=يفل من الجديل أربع خصال ٍ شقر تلعبه
الأولى من على الغرّه يمشطها هدب نجلاك=والأخرى من على خدتك فوق الصدر منكبه
وباقيهن يحف الجيد من يمناك لا يسراك=هلاليل ٍ ورى الكتفين كالشلال منصبه
وعزايه في نجوم الليل يوم تشع بين اشفاك=على غر ٍ كما اللولو تناظم حبة ٍ حبه
اليا منّك بلجت ابهن تلاعج ضيّهن في فاك=كما المطرق مع الساحر على البلور يضربه
انا وش جابني لك غير طرفك ذاك .. مدري ذاك=احبه قبل ما احبه .. واحبه عقب ما احبه
لا عل الكاهن اللي بالطلاسم ينفث الشرباك=يفك الله عيونك من عقابه ما تعاقبه
اخاف إنه بعث جنّه تشف السحر من عيناك=واخذ منهن رموز الطلسم اللي قام يكتبه
انا وش جرني للصيد لولا سحرك الفتاك=اسر قلبي طوال اليوم شرق به وغربه
عوافي يا خشيف الريم سبحان اللذي نجّاك=عقب يوم لقفتك فيه غافل ما انت متنبه
رميتك ثم تبعت خطاك .. احسب إن السهم ما اخطاك=حسبت إنك صويب وفيك جرح ٍ ضايع ٍ طبه
رميت إمكسر الكور وزهابي واقتفيت اخطاك=اجنّب كل حزم اتجنّبه وآذب ما تذبه
إلا منّك عديت احط ماطايه على ماطاك=والا منّك وثبت آمد شوقي واتوثبه
اقول شوي يطرحك الصواب هناك والا هناك=وهذا انته تجر اخطاي من خبه على خبه
وانا اللي ما رميتك لين قاديت اربع لمرماك=نظر عيني على مقتلك والنيشان والحبه
عجب كل العجب .. كيف السهم صابك ولا دمّاك=هو أنت اللي رميت أو هو خيال ٍ فيك متشبه
اشوف الزهر الاحمر واحسب انه من حمار إدماك=حسبت إن الزهور اليا نطف دمك تخضبه
خطا والا صواب !! الشمس غابت كيف عاد القاك=ومع ذا .. عقب حل الليل صيد الليل ما احبه
أبا اعوّد لتالي مزهبي واسرج ظلام احماك=ابا اجمع كوري المكسور .. واقدح فيه واشبه
محمد عامر بن نيف