آليا حدنك ظروف الزمان الله عليه يعين = قضى صبرك وقلبك من همومه جاه ماكفاه
نصيحه لك ثمينه لا تهاون بين حين وحين=خذ العبره من اللي فات واللي جاك تاتلقاه
ترى الفرصه تجي بالعمر مره ما تجي بعدين=لاجاتك لا تطوفها مادام الوضع في مجراه
تعلمك الليال المقبله وتشوف زين وشين=على مر السنين تعرف والعاقل يشوف اخطاه
قليل الخاتمه لا رحتله يلعب على الحبلين=تخليك الظروف تروحله وأنته تبي فرقاه
يحدنك ظروفك والعرب عنها ماهم دارين= توريك التعاسه يوم غيرك عاش في دنياه
ضعيف الناع ماينفعك لو إنه من الأدنين= تجنب سكته يا جعل من دونه يحول اقصاه
يباين معدن الرجال والخافي لزوم يبين=وكانه مانفع جعله مراح مقيط هو ورشاه
يقولون الدروب مفتحه والناس مختلفين= ومن جنب طريق اهل السنع خله على عمياه
عليك بخوت الطيب سلاحن معك ذو حدين= أليا منك نصيته قال تبغى المال ولا الجاه
يكفي منه لاجيته يقابلك بقبالن زين=ترى الطيب على ذكره وفعله معك ماتنساه
تعرفه عند وقفاته يرد الصاع بصاعين= يقول ابشر بعزك لا وصله العلم متعداه
معك في حزة الفزعات مختلفو عليه اثنين=يدير الراي بالحكمه هذا جعل الردي يفداه
الحميدي بن فارس بن مدلج