يايُمّه صعب نتخيّر ترى لبعض القلوب أقفال=وانا قلبي قفلته وصارمفتاحه حفظ عهدي
يايُمّه نفسي ماترجي سحاب ٍمارق ٍمحتال=يثير إحساس داخلها وإذا خفّ الحمل شدي
اعرْف ان المطر يغري//واعرْف ان المطر زوّال=ولي الإمطار ماتعني ولاتغنيني عن عدّي
وعدّي مرخصه يُمّه ولو ضاقت بي الأحوال=اموت ولا غريب الدار يقاسمني حلا ِوردِي
يايُمّه إن جيت له عطشى سِقاني من الغرام زلال=وله تـرنيـمـهٍ يسمـع صـداها كل ِمن حـدي
يجيني بالوله غارق واجيله وابل ٍهمّال =اجيله الشوق بي حارق ولمسات الهوى بردي
عشقته والبُنى الشامخ لخاطر هيبته قد مال=عشقني والعشق منه سلبني عقلي و رشدي
شربت زلال دمعاته عطينا للدموع إجلال=شربها مر دمعاتي قبل ما تجترح خـدي
يايُمّه للغرام فنون ابد مايفهمــه الجهــال=وابــد مـايــمسك زمـامه شعـور ٍللغدر لــدّي
غرامه قد تملكّني وداخلنا الهوى قد آل=الى حب ٍجمعني بسيف عاش العمر في غمدي
قسم باللي خلق فيني لسان ٍغرد الموال =واوقد داخلي عزه من ايام الوطن مهدي
لو القى قصر متشيد غرام وداخله اموال=والقى صاحبه واقف على باب السعد جندي
ابد ماخون من شدّ الخفوق لخاطره اميال=لجل يسكن ويتربع بداخل سجنـه الفـردي
يايُمّه من فقد عقله يبدّل معدنه برمال=مقوله صح قايلها قديمه من زمن جدي
عديل الروح مالكني قصر عمر الزمن او طال=احبه حيل يايُمّه فهمتي الحين وش قصدي؟؟