رقيته سلمّ افكاري وعانقت الفكر بحسان=وحانت ساعة الهامي وزار القلب مضنونه
تخيّلت الوصوف اللي ابد ماتجتمع بنسان=ملاك إزدان بوصوفن سحرها زاد بفنونه
ابيه الفارس الماهر يروض مُهرته بلحان=ترانيمه تهيضها على قيفان موزونه
يدينه غيمتن تِغرق همايلها وُطى الوديان=صقر حوران وسهومه تجيب الصيده مرهونه
ابي في نظرته حدّه يغار بقربه الشيهان=وسبابة يمينه سيف به احكام مسنونه
ابيه الراسي وترجح بعقله كفة الميزان=ومجنوني اذا لاقت عيونه عيني مجنونه
ابيه الغامض يزعزع بفكره صافي الاذهان=وابيه الواضح بنظره يترجم كل مضمونه
ابي لو جيت له بسمه يجيني خاضعن منْصان=حنون إن جيت له ونه يطببني على هونه
أصيل وساكن بأصله فروع مشجرات حسان=سلوم رجال وافعاله ببيض وجوه مقرونه
يشد برخوة ايامي ويرخي إن شدت الأزمان=بحر هايج بأعماقه جواهر عشق مخزونه
شاعر نسْج قِيفانه ترتيلن هواها زان=مثل عنتر تراتيله بدور النشر مسكونه
طموحي وراس امالي الاقي بالبشر إنسان=اعيش بخافقه دُرّه بوسط ِالقلب مكنونه
وإذا كان البشر سجنن يقيّد فرحتي بحزان =بداخل قيدهم يبقون دام القيد يزهونه
وانا باعيش بفراحي وبرفع راية العصيان=على قلبي بصك ابواب بها الاحزان مسجونه