سحابة مرة وطافت وحدها = وعساسها عدى الطويله ومالي
صبّح مديد عقيل مدري هجدها = وحط العسل في روس شوك السيالي
سلم نزل معها وسلم صعدها = بالجعبه اللي حط فيها وشالي
علم(ن) يقربها وعلم(ن) طردها = وعلم يلج اصداه في كل جالي
ماقلت نقصها ولاقلت زدها =قسها سواة الهيل وسط الدلالي
ياللي تعرف البايده من اجددها = المشترى والبيع كله حلالي
لايهمك اللي وقفته ماصمدها = بالهون حر وبالشدايد كحالي
واللي زرعها يابن شالح حصدها= وراع النخل توه يحط الكلالي
درا الزمان وعهدتها ماجردها = الجندي اللي فالسريه مثالي
سلمتها النقطه وكامل عتدها = كل الدقاق بذمته والجلالي
والبيت الاقشر والعدول ونضدها = شفت العقارب جوفها والنمالي
ناس(ن) تعجن السالفه وتعصدها = ماهم بعماني ولاهم خوالي
والمعرفه والموهبه نقتصدها = ونصونها صون الذهب والريالي
والناس يبلش بينها من نشدها= وليا نشدت الشخص الادنى شكالي
ولا وقع بالمخطيه وافتردها = وبين الخط والصح شد الرحالي
واللي على الحروه جواده لكدها = يعود ما رد البكار المتالي
ياعبدلي مابه وجيه نعبدها = الا وجه ربي عزيز الجلالي
مالي عذر وانا اقدر اخذ سددها = بالحربه اللي مثل راس الخلالي
حربة شعر وان صابها من جسدها = تحكي عن الواقع بعصر الخيالي
والعمله اللي خسرت من رصدها = ما حطها راع النظر راس مالي
مير القلوب الحاقده من حقدها = تقول قول(ن) للملا ما يقالي
والا النفوس الزاهده من زهدها = تخاف رب فوق الاكوان عالي
محي العظام الباليه من لحدها = علام مايخر ابالك وبالي
الشاعر / ناصر هوشان الزنغوب