اقدم لكم قصيدتي اللتي شاركت بها خصيصاً لملتقى منتديات الموازين الربيعي المخيم المقام بعنيزه واللتي القيتها منبريه
واليكم النص
سلام ياربعي يالاد الموازين=اهل الظفر واهل السطر والشهامه
سلام(ن)معطر بريح الرياحين=مع باقة ورود(ن) رفيع(ن) مقامه
ربعي بني عمي رجال(ن) مسمين=كل(ن) خذ من الطيب ذروة سنامه
ربعي هل الطالات وسط الميادين=كم بيرق(ن) لوح لنا بالزعامه
لا لاح بارقنا نهد المعادين=ونطش اكبر راس لو هو علامه
كم واحد(ن) منا يذوق الامرين=كم واحد(ن) منا تمنا السلامه
خذ مني الموجز وبعض العناوين=علم(ن) وكاد وكل مابه كرامه
ينبيك عنا سجن الاشراف ياحسين=يوم انتخى فينا الصديق بـ زهامه
هاك القصير اللي شكى السجن والبين=جيناه فزاعه بـ ليل الجهامه
جينا قبل لا تشرق الشمس وتبين=كل(ن) على حصانه وماسك لجامه
وبالصبح فكينا قيود المساجين=واظهرنا صاحبنا وغشته ابتسامه
هذا فعل واحد عليه البراهين=ولا الفعول اكثار عز وقرامه
واليوم في حكم الحرار السلاطين=في خير وبنعمه وامان وسلامه
يالله عسا ذا لحكم يمتد لـ سنين=ويطول به حاكم نكن احترامه
هذا صدى صوتي ملبي لـ داعين=جاكم هجوسي يحتدم بـ حتدامه
وختام ياربعي صعاط المجانين=صلوا على محمد شفيع القيامه
الجد زراقـي وحنـا زراريـق=والناس لنـا تعتـرف وتعرفنـا
مثل الجبال الشامخات الشواهيـق=ماهمنا صفق الهواء في طرفنـا
رجالنا معروف في ساعة الضيق=يكفي عن اللي غايبٍ من سلفنا
وافعالنا ماهـي دعايـه وتلفيـق=وتشهد لنا وقفاتنـا اللـي وقفنـا
خصيمنا يغشى من الغبن ويفيـق=لو يجتهد ماردنـا عـن هدفنـا
ماعمرنا خفنـا وعشنـا مدانيـق=الا من اللي كوّن الكـون خفنـا
يشهد لنا المعبود رب المخاليـق=اللي علـى تقـواه نحيـا ونفنـا