اغلى البشر ياسعود يعلن رحيله

ياسعود دمعي سال من محجر العين = الدمع يذرف والمصيبه ثقيله

صكات بقعاءجات بين العشاوين = والي فقد غاليه واعزتيله

وانا فقدت ابوي ريف المخلين = وعون الضعيف الي عظامه هزيله

عليه هلي صافي الدمع ياعين = اظن جرح القلب يبرد غليله

وعلى غزير الدمع والله لتبطين = مادام غير الدمع مافيه حيله

إبكي على الي راح بالمذهب الزين= رحل من الدنيا وحصل حصيله

ترك عياله والظعن والبعارين = واخّــر علوم ٍكلبوها جزيله

كل القبائل فيه جونا معزين = وكلٍ دموعه مثل رش المخيله

ماقالو انه من شيوخ الموازين = قالو نعده من شيوخ القبيله

غلاب من روس الرجال السلاطين= من نسل عابد والخصايل فضيله

له سمعةٍتذكر على العسر واللين = سمعة فخر ماهي علومٍ رذيله

وله منزلٍ بين الرجال المسمين = وبالماقف الغصاب يسلم دخيله

مايعرف دروب الردا والرديين = وعلى الدروب العوج ماسال سيله

يشهد له كبار العرب والصغيرين= عن العدل والحق مافيه ميله

وبأمر الذي نزل تبارك وياسين =جاه القضاء المكتوب باهون وسيله

واليوم راعي الجود وينه وانا وين= ابوي راح ولايجيلي بديله

ليتك تجي يابوي وتشوف بالعين = حالي عقب فرقاك صارت نحيله

اجاذب الونات والناس ممسين = اسهر وقلبي فيه مثل المليله

ليل ذكرت ايامنا ماضي سنين = ماكنها الا قبل يومٍ وليله


يوم انت ترعانا وحنا صغيرين = وعينك علينا كل لحظه قليله

علمتنا دروب الرجال الطليقين = وحذرتنا درب الخطاء والفشيله

وتقول يا عيالي تراكم عريبين = والحمل يبغا له جمالٍ تشيله

وابشرك ياسيد الجود هالحين = على وصاتك قايدين الكحيله

صرنا على ممشاك يابوي ماشين= لوكان ماهداج مثل الثميله

فيما مضا يابوي كنا سعيدين = وسعادة الدنيا ماصارت طويله

في شهر ذالحجه وحنا مصلين = عليك في وسط اللحد والنثيله

باخر شهر من عام سبعه وعشرين= اغلى البشر ياسعود يعلن رحيله

وحنا بقسمة خالق العرش راضين = والي كتب للعبد لازم يجيله

يالله يالمعبود يامخلص الدين = يالي ماغيرك واحدٍ نلتجيله

تحط في قبره رياض وبساتين = وفي جنة الفردوس كرّم نزيله

صح لسانك ابو عيسي ابيات روعه ويعطيك الف عافيه وتسلم يمينك

صح لسانك يا ابوعيسى وابيات جزله وانت شاعر من دون شهادتي والله يرحم والدك ويسكنه الجنه ويغسله بالماء والثلج والبرد وينقيه من الخطايا كما ينقى الثوب الابيض من الدنس

وانت واخوانك ما شين على وصات الوالد والله لا يفرقكم ويجمعكم على الخير




تقبل مروري

رحم الله والدك يا أبو عيسى وأسكنه فسيح جنانه وأصدق الشعر دائماً من وجهة نظري هي الرثاء حيث الراثي دائماً يقول شعره بروح صادقة لا يرجو من ورائها عوضاً...

تقول:

ماقالو انه من شيـوخ الموازيـن=قالو نعـده مـن شيـوخ القبيلـه

يستاهل ...يستاهل رحمه الله

وابشرك ياسيـد الجـود هالحيـن=علـى وصاتـك قايديـن الكحيلـه
صرنا على ممشاك يابوي ماشيـن=لوكـان ماهـداج مثـل الثميـلـه

إن شاء الله تسيرون على خطى والدكم ولو أن هداج ليس مثل الثميله ولكن هو خلف رجال ماشيين على طريقه..

وصح لسانك مليون يا أبو عيسى

صح لسانك يابو عيسى ورحم الله والدك

اشكركم جميعا