ياليــل ياكثــر العتب والمشــــاريه

ياليل ياكثر العتب والمشاريه
وقلب يفوز بطعنته كل غالي

ماباقي الا نعطي القوس باريه
ونصبر على رماح الجفا والتعالي

لاطاح حظك ماحد جاء يصحيه
وان قام حظك عد روس الجبالي

سجوى غرامه ساقها صحصح التيه
يطوي مسافات الديار الخوالي

دونه سراب البعد يشّر بياديه
تحدرت به نجد يم الشمالي

لاغاب واقفى من توده وتغليه
ماعادله طاري ولاله مجالي

يمر في بالي ولاني بناسيه
الا لياغفيت جاء في خيالي

كنه يصحيني بصوته وانا اوحيه
جدد جروحي ماتركني بحالي

حسبي عليه الله والله يجازيه
مالي وماله كان ماله ومالي

اهوه يبيني لارحل عني ابكيه
والا يبي دمعي ليا جف سالي

والا يبي شعري تسابق قوافيه
عليه لكن صعب ذل الرجالي

والله ماطيعه فالخطا اللي يسويه
صحوة عقل والا جنون الهبالي

لو كان حبه شاهرات غوانيه
ماهو بحب ماله اول وتالي

ولو كان انا ماقوى فراقه ولابيه
ابقى عزيز النفس بين العيالي

من باعني بعته ولايمكن اشريه
اجزم وابيعه لو بربع الريالي

ومن لاتربّى خل وقته يربيه
ماني مربي مثل سود الليالي

صح لسان شاعرها ولاهنت اخوي عطاااوي مطنووخ على النقل.وفضلآ وليس امرآ كتابه اسم الشاعر او كتابه منقول.حفظآ لحقوق الغير

مشكور ابو راكان عالمرور,,
اسعدني تواجدك,,
وهذي القصيده للشاعر غزاي العضياني
واعتذر عن عدم كتابة اسم الشاعر لاني نزلت المشاركه في عجل,,
تحيــــــــــــــــــاتي,,

ابيات في قمة الروووعه
تسلم يمينك على النقل المميز
ويعطيك الف عافيه

صح لسان الشاعرغزاي العضياني لاهنت عطاوي على النقل الموفق .

الله الله .. صح لسان الشاعر .. وتسلم أخوي عطاوي مطنوخ على النقل الحلو

ولك مني جزيل الشكر

صح لسان الشاعرغزاي العضياني لاهنت عطاوي على النقل الموفق .

صح لسان الشاعر
لاهنت على النقل

أبيات في قمة الروووووووووووووووووووعه
لاهنت أخوي ع النقل المميز
ألف شكرلك

صح لسان شاعرها ويعطيك العافيه اخوي عطاوي مطنوخ على هالنقل المميز من تميزك يالغالي


دمت لنااا يارب