مجلس أبن مصاول ....للجميع أرحبووووووووووووو

اليوم جايب لكم قصيدة مشهوره للــشاعر الكبير ابراهيم بن جعيثن وهي مشهورة بين الباديه والحاضرة يلهجون بها إذا ركبوا الهجن

أمس الضحى دق بي هوجاس=والقلب كنه على مله
كنه يقلب على محماس=فوحه كما فايح الدله
الله يا لولا الحيا يا ناس=لقول ياويل من بان به خله
من شوفتي كامل الأجناس=يلعب بسيف الهوى سله
عذب النبا زاهي الألباس=مشيه وزينه على حله
حمر الثمر في الصدر جلاس=مثل الفناجيل مقتله
حدر المليثم ثلاث العاس=وبين الشفايا دوا العله
تغضي حيا كن فيها انعاس=واحجيجه نون بسمله
وان حركت عنقها والراس=شقرٍ عثا كيلها فله
خوفه من السوق والأنجاس=ينتل مني وانا أتله
قمت اتحيسب على البلاس=عساه يظهر من المله
شفت الجفا لي منه والياس=والشمس عن بارد الظله
عرضتها بدين ابو عباس=خذني معك داخل الفله
قالت على بيتنا حراس=ودي بيتك ولا أدله
خمسة عشر سنها وقياس=حولين ويسامح الزله
سميها عبد ابن حواس=ياقوت بالهرج ما امله
يازين مشيه يشيل الكاس=ياطارشي بالعجل قله
قصره عماره بليا ساس=عقب السفر مركبه شله

منقووول من http://www.almizany.com/showthread.p...newpost&t=2657

أبن مصاول

مشكوووور على النقل اللي من بعيد هههههههههههههههه

حياك اخوي ولد الروسان وسرني رؤيتك في مجلس أبن مصاول ......ولا تنسانا من مداخلاتك المفيده

يوم مريت من هنيا وشفت المجلس الزين والربع اللي جايين واللي رايحين قلت أبي اشارك في هالجلس بهالسالفه:

هذي قصه وقصيده صارت على شاعر يقاله ابن علاج (الله يرحمه)


يقولك كان ابن علاج ويكنى بابو عبد الله ساكن بقصر ابن عقيل اللي بجنب

الرس وعنده مزرعته ويفلح هو وعياله

ويوم من الايام وهم يخرفون بالنخل مادراهم الداري الا ورجد الفرس

يوم جت مع القاع يوم قرب اثره الامير ابن عقيل رايح لعمه بالقريّه

(ديرة وراهم شوي).

قابله ابو عبد الله وقال تقهوا يالامير تقهوا

قاله الامير هي والمه؟؟

قال تالم هالحين

قال الامير يوم تالم وانا قد وصلت لعمي بالقريّه

قال ابو عبد الله ايه يالله مقسوم خير

رجع ابو عبد الله لعياله وقال انتبهوا للامير الى رجع نزين القهوه

حتى مايصيرله عذر

اثر الامير مالقى عمه ورجع قبل حروته ولا دروا الا رجد الفرس مثل رجده يوم جا

تقهوى يالامير تقهوى

قال هي والمه ؟

قاله ابو عبد الله تالم هالحين الشاذلي بالكيس والنار حيه

قال الامير يوم تالم وانا قد وصلت لاهلي

قاله ابو عبد الله ايه يالله مقسوم خير

ابو عبد الله حزت في نفسه وسواله قصيده

وكان عندهم عاده بعد صلاة الجمعه يتقهوون عند الامير

يوم دخل ابو عبدالله

قال الامير عندي يابو عبد الله عندي

قال لا ابجي بذا واشر على مكان مقابل للامير

يوم جلسوا وتقهوى الشاعر

قال الامير ماشاء الله الفلاليح هالسنه يخرفون ونتاجهم واجد

ولله الحمد امس رحت لعمي بالقريّه وابتقهوى عند ابو عبد الله كل مارحت وجيت

بس ماهو يمي يشتغل

قال ابو عبد الله هو صاق الامير حنا لنا ثلاث حزات تلقى القهوه والمه

وغيره الى شافت العين العين رحبت وهلت قال الامير وشن الثلاث حزات

قال ابن علاج

اللي يبي فنجالنا طلعت الشمس = او قدم تطلع يوم تقسيم الارزاق
والظهر واللي يوم نفرغ من الخمس = يقدم علي وهن على الله بالانفاق
فنجال بن معذبينه عن اللمس = ماهو شراكه بين حامس ودقاق
نقلطله اللي مايوادي عن الحمس = من خوف يلمسه النيا هو والاحراق
وان كان باطراف القنا للنما رمس = نشفق نحطه للمسير اليا تاق
وان زاد رزق اليوم عن رزق قبل امس = نشفق لنطح الموجبه شد الاشفاق

وسلامتكم

قال الامير والله يبو عبد الله اني ماتعييت عن القهوه

الا ابي هالكليمات وحصلن لكن ترانا باكر بنشرب القهوة عندك

قال ابو عبد الله الله يحييكم تحيايا الارض للغيث

انتهت

..............

أرجو ان أظفت شيئاً مميزاً

نعم قد اظفت شيئاً مميزاً وقصة وابيات مميزه ولا هنتم على المرور جميعاً ولك اخي المستعجل كل الشكر

اليوم جايب لكم سالفة البيت اللي يقول:

المسعد اللي يهتني في شبابه=انهب من الدنيا تراها نهايب

قائل هذا البيت هو الشاعر الفارس محمد بن دوخي السمير , وله خمسة من الابناء وكانوا من الفرسان المشاهير وذات يوم أحاطوا به في مجلسه وكان لديه صديقه الشيخ سمير بن زيد الجربا فأعجب هذا الصديق برجولة أولاد الشيخ محمد وسأله عنهم هل هم مثل ابيهم فقال ابوهم : لاأرى فيهم عيبا الا انني اعتقد انهم ليسوا من طوال الأعمار يقصد انهم شجعان مغامرون وما ان اتم كلامه حتى اغارت عليهم احدى القبائل واخذت الابل فركب أولاد محمد واقتفوا اثر القوم حتى لحقوا بهم ودارت بينهم معركة رهيبه قتل على اثرها الأولاد الخمسه جميعهم.

وفي تلك الليله أقيم مأتم في بيت الفارس محمد السمير وحين رأى النسوة ترفع اصواتهن بالعويل صبر وتجلد وفرق بين النسوة ثم امر زوجته أن تتزين ففعلت وقام فصلى وطلب من ربه العوض.

وبقدرة الله حملت زوجته في تلك الليله فأنجبت له توأم من الذكور وبعد مضي أربعة عشر عاما كبر الأطفال وصاروا من الفرسان المعدودين وفي هذه الأثناء قدم الشيخ سمير بن زيدان صديق محمد وبادر صديقه بالسؤال : لعل الله عوضك عن عيالك الذين فقدتهم .فأجابه الشيخ محمد بن دوخي السمير بهذه الأبيات اللتي ذكرها عبدالله العبار العنزي حيث قال:

أنا ويا الدنيا شديد الحرابه=نوب تغلبنا ونوب عليها الغلايب
طرادها طراد ضوح السحابه=وقضابها قضاب صلف الهبايب
من عقب ماخلت دياري خرابه=جابت لنا من غيب الأيام غايب
جابت لي عيال نهار الحرابه=عند الملاقا ينطحون الكتايب
يا سمير بن زيدان دنياك غابه=توريك من عقب الحلاه النشايب
المسعد اللي يهتني في شبابه=انهب من الدنيا تراها نهايب
والحي لابـــده تجرد ثيابه=صيور مايركز عليه النصايب

منقووول

وتقبلوا تحياتي

]دخلت المجلس والله ياهو مهجوريمكن علشان البرد(6)أيام مافيه احد؟؟؟

جبت لكم.................وش معنى العنود؟؟؟؟



:+: الـعـنــــــود :+:

العنود هي الظبيه التي تقود سرب الظباء
وترفض ان تكون تابعه لاحد
فهي عنيدة لاتقبل الانقياد وراء الظباء
انما تسير امامها وتتبعها البقية
والاسم فصيح
(عند) تباعد وانصرف فهو (عنيد) وهي (عنيده)



يقول شاعرنا المناعي:

يا العنود اللي ملـك قلبـي هـواك
صرت مثل الروح في صدري شريك
من عرفتك وانـت يتزايـد غـلاك
وصار نبضي بالمشاعـر يحتويـك



ويقول شاعرنا سعيد الحفيتي:

العنود اللي تميـز بالجمـال
مثله من بين الخلايق ماحصل
للتغلي ماعطى غيره مجـال
فالحشا اسس مكانه واستحل




ويقول شاعرنا ضاوي:

يامل قلب ٍ غدت العنود عذاب ٍ له
لاعاد يسمع ولابيطيـع عذالـي
ابوجديل ٍ على دمث النحر هلـه
والخد بارق ظلام ٍ يشعل شعالي


وداعااااااااااااااااااااااااااااااااااا اتمنى اتعجبكم.

حلانجد

حيالله أم عرنان يا هلا ويا مرحباً أما بالنسبة أن المجلس مهجور له ستة أيام...

فلإنه قد مر بنا فترة العيد وفي هذه الفترة يكون الناس مشغولون بالإستعداد للعيد ثم بعده ياتي العيد فالربع ما يجون للمجلس لأنهم مشغولن حدهم ههههههههههه<<<<رقع يا مرقع


المهم بالنسبة للعنود ومعناها فأشكرك جزيل الشكر فقد أثريتي مجلس أبن مصاول المتواضع بهذه الإظافة الرائعة عن معنى أسم يتردد كثيراً وكثيراً من الناس لا يعرفون معناه ....بل يرددون بدون تمعن فيما يعني وسوف أظيف أيضاً مما احفظ قول الأمير الشاعر خالد الفيصل حيث قال:

من خصائص عنود الصيد كثر الطواري=وعادة الظبي يجفل لى تحرك ظلاله
ما يصيد الجوازي غير بخص و ضاري=القنص بالركاده والتسرع جهاله

لقد أظفت فأبدعتي..

أخوك الكبير أبن مصاول

اليوم جايب لكم سالفة الشاعر حمد بن عبدالرجمن الدعيج ودكاكين في مرات تهد...


تمر على الإنسان مواقف تهز وجدانه وتعيده الذاكرة قسراً إلى الوراء ليقلب الماضي في حياته وهذا ما حصل للشاعر حمد بن عبدالرحمن الدعيج (نديم كميت) الذي استوقفه أحد هذه المواقف وهو يرى المحلات التجارية القديمة في مدينة مرات والتي تعود ملكيتها للشيخ محمد بن عبدالرحمن الضويحي -رحمه الله- وهي تهد وكانت تسمى في الماضي القريب دكاكين (جمع دكان)، فبعد عشرات السنين رأى بعينه كيف تهاوت أمام معاول الهدم وآلياته، وحيث كانت صورتها ترتسم في ذاكرته منذ صباه فقد جادت قريحته بأبيات جميلة ضمنها حنينه إلى دكاكين والده التي هدت هي الأخرى قبلها بسنوات فقال هذه القصيدة وأسندها إلى ابنه حمود وهي:



هدوا دكاكين مع الحوش ياحمـود
وباقي البقايا دمعة فـوق ذكـراه

ياغليها ياحمود في خاطر العـود
هذي سواة الوقت لاقفـت مطايـاه

مرحوم ياشيخ رحل دون منقـود
يفز قلبي كلمـا أوحيـت طريـاه

ذكرت عودي مع دكاكينه الـزود
والدار والبرحه غدت تقل مسفـاه

ياشينها لاجت على أيامها السـود
تفني الشباب وباقي العمر ويـلاه

ياحمود مد الشوف والبيت موجود
من قبل يفنى باقي الحوش عـزاه

هذي سواة الوقت والوقت معـدود
عمر ترحل وأخلف الوقت مبـداه

خص إلى شفته مع البيت مهـدود
هاك الحويش اللي بقى منه مبنـاه

مرت سنين العمر والعمر محـدود
كل له أعوامـه والاقـدار تحـداه

أنا أشهد ان القلب ياحمود مقـرود
لا لدّيـم الماضـي اللـي تمنـاه

يدعي عيوني بالبكا دمـع مبـدود
إلى ذكر ماضي العمر ول ما أقساه

مرحوم ياعود توفى مـع جـدود
جعلـه بجنـات مقـره وسكنـاه

لا و اسفاب العمر لازل ياحمـود
لا واسفـاب العمـر لا واسفابـاه


أبن مصاول

المشاركة الأصلية كتبت بواسطة أبن مصاول

اليوم جايب لكم قصيدة مشهوره للــشاعر الكبير ابراهيم بن جعيثن وهي مشهورة بين الباديه والحاضرة يلهجون بها إذا ركبوا الهجن

أمس الضحى دق بي هوجاس=والقلب كنه على مله
كنه يقلب على محماس=فوحه كما فايح الدله
الله يا لولا الحيا يا ناس=لقول ياويل من بان به خله
من شوفتي كامل الأجناس=يلعب بسيف الهوى سله
عذب النبا زاهي الألباس=مشيه وزينه على حله
حمر الثمر في الصدر جلاس=مثل الفناجيل مقتله
حدر المليثم ثلاث العاس=وبين الشفايا دوا العله
تغضي حيا كن فيها انعاس=واحجيجه نون بسمله
وان حركت عنقها والراس=شقرٍ عثا كيلها فله
خوفه من السوق والأنجاس=ينتل مني وانا أتله
قمت اتحيسب على البلاس=عساه يظهر من المله
شفت الجفا لي منه والياس=والشمس عن بارد الظله
عرضتها بدين ابو عباس=خذني معك داخل الفله
قالت على بيتنا حراس=ودي بيتك ولا أدله
خمسة عشر سنها وقياس=حولين ويسامح الزله
سميها عبد ابن حواس=ياقوت بالهرج ما امله
يازين مشيه يشيل الكاس=ياطارشي بالعجل قله
قصره عماره بليا ساس=عقب السفر مركبه شله

منقووول من http://www.almizany.com/showthread.p...newpost&t=2657

أبن مصاول

صح الله لسانك يابن مصاول أبيت جميله ولا اروع منها الا ناقلها

سؤال: أبراهيم بن جعيثن
وش يقرب للشاعر المعروف راشد بن جعيثن