الأيام الخوالي..

قصيدة تعبر عن الأيام الخوالي

نسيتي المزح بالصفه=نسيتي اللعب والطبه
نسيتي كشخة عقـالي=مع الثوبين ابو خبــه
نسيتي غترة المـلـمل=تغــطيني تــقل جــبـــه
نسيتي الركض بالطايه=اذا في دارنا الشبه
نسيتي فضلة القرصان=سباقن يمهن لــبـــه
نسيتي إزعاجنا لأمــــك=وهي بالحوش منكبه
نسيتي معلف أم حسين=تصــفيـــنه وانا أكـــبه
لبستي ثوبك الــــتنـــتر=أغيضك لنقطع حــــبه
نسيتي الفكس والوازلين=نهج عنه ولا نحبه
تـــبــيه أمـــك لرجلـــينه=وحنى نهوش ونسبه
نسيتي بســطـة عـــميان=صلاة العصر بالقبه
نسيتي صويلح الماصل=نسيتي خرطه وسبه
نسيتي سوير الخــــــبله=تشيل تراب وتكبه
نسيتي شنطة الــــــجده=حلاو وشي نلعبه
نسيتي نخل جدتــنا=نسيتي الطين نزلق به
نسيتي الساقي الاخضر=وماه البارد وشربه
نسيتي قولك معصقــــل=وانا أعيرك يالدبه
نسيتي جملة العسبان= هي الموتر ونلعبه
تطورنــــا بدنيـــانا=في وسط السوق نطردبه
نسيتي موعد الحنه =اذا جاء جتكم الخبه
نسيتي تمرة الجصه=نجيب الدبس ونكبه
نسيتي دريول الحاره=يجينا ونوقف بدربه
نسيتي طيحتك بالليل=وهي ظلمه وانا السبه
نسيتي أكلة المرقوق=تحبينه وانا أحبه
تجي أمك تهاوشنا=تحط بعيوننا الشبه
نسيتي كحة البندق=تنحنح ونتهي لبه
نسيتي تريكنا المحلي=نغسله قبل لنشبه
دعينا الله لأجل العز=نجيب تويس نلعبه
نلاحقها بوسط الحوش=من الركضه نغبربه
نسيتي شقوقي بالطرمه=نشوف الجار في دربه
نسيتي صبة المرزام=يصب الماء ونسبح به
نسيتي الفقر أوصف لك=زمان ٍ ربي أعلم به
نسيتي كيف تنسينه=دخلتي العز من جنبه
لقيتي الدش والتلفاز=مع المكياج ما أحبه
طلبتي مبيض وبودر=بدل ديرم بدل كحله
لك ِ الدنيا بزخرفها =لنا قلب ٍ عبد ربه
أبي الفردوس في بالي=أبي الفردوس في بالي
أبي الفردوس في بالي=مع المختار مع صحبه

طبعاً هذه قصيدة قديمه وجدتها بين ملفاتي القديمه ولها تسجيل صوتي سأدرجه حين تقع عيني عليه

تقبلوا شكري الجزيل

أبن مصاول

نسيتي الفكس والوازلين = نهـج عنـه ولا نحبـه
تبيـه أمـك لرجليـنـه = وحنى نهـوش ونسبـه
نسيتي بسطـة عميـان = صـلاة العصـر بالقبـه
نسيتي صويلح الماصـل = نسيتي خرطـه وسبـه
نسيتي سويـر الخبلـه = تشيـل تـراب وتكبـه
نسيتي شنطـة الجـده = حـلاو وشـي نلعـبـه

الوازلين< هذا يدل على انها قديمه وبقوه بعد.. يعطيك العافيه أخوي أبن مصاول على هالنقل الجميل .. تحياتي سلطان الميزاني.

لا شكر على واجب اخوي سلطان وهذه القصيدة الفكاهيه الذي انشأها من اهل الحضر وقد أجاد بها حتى لو لم يكن فيها صور ومعاني ولكنها قصيدة مباشرة جالت في صدر صاحبها فقالها وقد أرجعنا بها الى الأيام الخوالي..

أشكر لك مرورك وتعليقك يا غالي..

ابن مصاول