اعضاء هذا المنتدى الكرام هذي قصيدة للشاعر /خلف بن فيحان الدجيماء
وفيها لغز وجهها إلى احد اصدقائه فيقول الشاعر خلف :
البارحه قمت اتفكر لحالي=وقامت علي تطري طواري كثيره
يالله يالمعبود منشي الخيالي=ياعلم(ن)بالبينة والسريره
تغفر ذنوبي ياعزيز الجلالي=وجميع مسلم من جهنم تجيره
يابو علي فالوقت ميل وعدالي=اليا صفى يوم(ن)ضهر يوم(ن)غيره
مذكورتن في ماضيات الليالي =ماهي وليدة بالليال الأخيره
مدري كيف ابدا مير يابن الحلالي=عندي سؤال فيه محتار حيره
انشدك عن رجل(ن)طويل(ن)هلالي=طال النجوم يوم انسدح حظ غيره
بالطيب يذكر عند كل الرجالي=ماهو ردي ولا يمينه قصيره
ومن الكرم ماله يافاطم مثالي=اكرم من ابن مهيد وسط الجزيره
واليا عطى يعطي نفيس الحلالي=والظالعة والهازلة بالحظيره
انشهد ان هذا كريم السبالي=كلن يقول يارب كثر بخيره
ياخذ من راسه ماسمع هرج خالي=وهل العقول النيرة تستشيره
واليا مشى يمشي مع اهل المعالي=وهذي صفاته بالصفات المنيره
ماقل دل وش تبي بالطوالي=واطلب عسى بالامر خيرا ً وخيره
عطني جوابك بعد طرح السؤالي=مني على حظرتك يابن العشيره
وهذا رد الشاعر فاطم يقول:
الله هو اللي له جميع الكمالي=سبحانه المعبود لا إله غيره
يامرحبابك ياصدوق المقالي=انت الشجاع اللي سليم(ن)ضميره
هذا يابن فيحان طبع الليالي=كم واحد(ن)يالقرم حاسه مريره
ياكثر من منها يذوق النكالي=عقب الفرح يصبح بحالة خطيره
واحلى من المي القراح الزلالي=للبعض ولا البعض تقلع مصيره
فيها الخبل يامر وينهى وغالي=وطالت ايدينه عقب ماهي قصيره
ويوم انت تسأل عن هذاك الهلالي=خذ الاجابة لاخذتك المغيره
الحر ميقاعه بروس الطوالي=ما ياقع إلا بجبال(ن)عسيره
وصيده جزيل ولا يصيد الهزالي=ومخالبه مثل السيوف الشطيره
خطو أشقر(ن)قلبه من الخوف خالي=الله من كل المصايب يجيره
ذاك الزمان اللي به المر حالي=كنا بنعمه يالمطيري كبيره
واليوم دور معقدين الحبالي=كسيرتن ياكبرها من كسيره
كم من غبين(ن)ماحسب للتوالي=وشر(ن)على كل الوجيه السفيره
والصبر مفتاح الفرج لاتبالي=الله جعل بعد العسيره يسيره
خلك على ما قيل صدرك شمالي=ولاتلتفت للناقصه والحقيره
واعذرونا على طريقة كتابة القصيدة ولكم جزيل الشكر .