قصيدة ... الوقت ..

بسم الله الرحمن الرحيم

السلام عليكم ورحمة الله وبركاته

اضع بين ايديكم قصيده في الوقت وهي تعبر نفسها

البارحه هاضت قريحة محاكيك =وبيوت شعري جاتني مستّهله
من يوم ماقلبي لفته الدواكيك=دكاك يرجف به ودكاك تله
كنه يخرّم بالابر والمشابيك=اللين خلا القلب مثل الأخله
احترت يانايف بوقت الشرابيك=وازريت اقدي به على أيات مله
وقتن ينعّم للدجاجه وللديك=وذيب الغداري عايشن في مذله
وقتن تمرجل به رخوم وصعاليك= وقتن عطاهم واستضلوا بضله
لاتقوله جدك وكمهي مغازيك=وعدوكم يشكي ثمانين عله
اليا بغيت النعم كم هي مصاريك=وكم لك سياره وكم لك فله
وان كان ماعندك دراهم وتمليك=النعم مانته داخلن في سجله
ياصاحبي تغير الوقت ينبيك=ان الزمن سود الليالي طون له
ويانايف الروقي عسى الله يمسيك=بالورد والريحان والطيب كله
ياللي علوم المرجله من مباديك=وعلى الرفاقه مايجي منك زله
عساه يسلم راس عودن مربيك=على الكرم والطيب دقه وجله
على طبوع العود الاول مضريك=عزالله انه ماخسر فيك لله
ماقول غير ونعم لاحل طاريك=نعم ٍ ونعم ونعم وانتم هلن له
ماقلتها باجاملك او اداريك=ولاقلتها من شان نشر المجله
بس انها هاضت قريحة محاكيك=وابيوت شعري جاتني مستهله

وسلامتكم ..

ياسلام على الجزاله والتمكن الحرفي
صح لسانك مليون يابو خالد على الشامخه
وسلم ابداعك والله ..
هطول ثاني من سحابة شعرك
وننتظر المزيد فلا تحرمنا من فيضك ...

اليا بغيت النعم كم هي مصاريك=وكم لك سياره وكم لك فله
وان كان ماعندك دراهم وتمليك=النعم مانته داخلن في سجله

ادددخل على الله يابو مجاهد

اختصرت لنا الواقع بهذه القصيده المترررفه

جززززززززززل وخالقك
سجل اعجابي يالقرم

صح لسانك ... كلمات طيبه من واحدن اطيب


بيض الله وجهك ويعطيك الف عافيه

صح لسانك أخوي بدر بن مجاهد

صح لسانك يابو خالد

جميل جداااا ماقرأت من درر

تحيياتي

صح لسانك ابو خالد واعتلى شانك

ونطلب المزيد من مكنوزك الشعري

لك ودي واحترامي

صح لسانك يا أبو خالد و هذه الأيام النعم مروحٍ به الرجال اللي حافظوا على المرجله والمادة هي عصب هذا الزمن الرأسمالي فقلي كم رصيدك أقول لك من تكون!!

مع العلم ان الرجل هو من يقول ها انا ذا لا من يقول كان أبي ويعدد منجزات أجداده ويعتقد بانها سوف تبني له مستقبلاً وردياً..

قصيدة رائعة ويستاهل نايف الروقي الذي أسندت له القصيدة وألى الأمام..

مبدع يابو خالد

نص يجبرني على قرائته دائما

وان كان ماعندك دراهم وتمليـك
النعم مانته داخلن فـي سجلـه

ماتجيب إلا الجزل وحضورك طاغي

دمت بخير
أخوك
فيصل المطنوخ

صح لسانك الشاعر بدر بن مجاهد
قصيده جزله ولاهو بمستغرب عليك الجزاله
استمتعت بقرائتها وبما فيها من أيضاحات
لوقتنا الحالي
دمت بخير